Mayıs 3 künü Bağçasaray civarında keçirilgen «Hıdırlez» qırımtatar milliy bayramında Cürçi rayonından kelgen iştirakçiler Qırımnıñ Rusiye akimiyetine qalaqaynıñ yuvarlanuvı ile bağlı adetni numayış ettiler.
Adetlerge köre, «Hıdırlez» vaqtında eñ qart insan qalaqaynı yuvarlata. Yüzqoyun tüşse, yıl bereketsiz olur, aks alda – bereketli.
Cürçi rayonı çadırına Cumhuriyet başı Sergey Aksenov, Devlet şurası spikeri Vladimir Konstantinov ve muavini Remzi İlyasov kelgen vaqıtta milliy kiyimli erkek qalaqaynı yuvarlattı. Amma ötmek yüzqoyun tüşti. Bundan soñ erkek daa üç kere areket etti, amma muvafaqiyetsiz. Bazıları «Yıl bereketsiz olur» dep kederlendi.
Buña baqmadan, akimiyet vekilleri ile birlikte olğan qadın qalaqaynı köterip, Aksenov, Konstantinov ve İlyasovğa birer tilim aşattı. Bunı körgen erkek: «Başta yerde yuvarlata, soñra Aksenovğa bereler. SubhanAllah», – dep çorlandı. Birinci şahıslar ise ötmekni memnüniyet ile aşap, teşkilâtçılarğa minnetdarlığını bildirip kettiler.
Hatırlatamız, Qırım musulmanları diniy idareisnde qalaqaynı yuvarlatmaq adetini alğışlamaylar. Evel «Avdet» gazetasına Qırım musulmanları müftisi Ayder İsmailov bu adet «kelecekni evelden ögrenmek ıntıluv kibi tanıla ve musulman ümdelerine ters kele» kibi izaatını bergen edi. «Er şey tek Allahqa bağlı olğanını bilemiz. Bunıñ ile ötmekke ürmetsizlik kösterile: onı yerge tüşürip, yuvarlatalar», – dey İsmailov
Şusı meraqlı ki, «Hıdırlez» bayramında mayıs 3 künü Qırım musulmanları müftisi Emirali Ablayev da buluna edi.
Hatırlatamız, bazar künü, mayısnıñ 3-de, Hıdırlez bayramı «Şaherezada» medeniy-eglenceli merkeziniñ meydanında keçirildi (Bağçasaray rayonı, Aqmescit – Bağçasaray yolunıñ 25-nci kilometrinde).
Evel Qırım.Aqiqat haber etkeni kibi, Qırım ükümeti Hıdırlezge 40 biñ insannıñ qoşulması aqta ayta eken.
Qırım.Aqiqat bildirgeni kibi, Bağçasaray regional meclisiniñ toplaşuvında aprel 18-de Qırımnıñ şimdiki akimiyeti qırımtatarlarnıñ milliy bayramı Hıdırlez ile bağlı tedbirlerde iştirak etmemek qararı qabul etildi.
Qırımtatar Milliy Meclisiniñ reisi Refat Çubarov aprel 26-da aydınlatılğan muracaatında Qırım akimiyeti Hıdırlez bayramını qırımtatar halqını bölmek içün qullana, – dep aytqan edi.
