Bağçasaray regional meclisiniñ toplaşuvında aprel 18-de Qırımnıñ şimdiki akimiyeti qırımtatarlarnıñ milliy bayramı Hıdırlez ile bağlı keçirecek tedbirlerde iştirak etmemek qararı qabul etildi.
Bunı Qırımtatar Milliy Meclisiniñ reis muavini İlmi Ümerov bildire.
«Regional meclis Qırımtatar Milliy Meclisine muracaatta bulunıp, akimiyet tarafından keçirilecek «qıdırlezge» cumhuriyet derecesinde qoltutmamağa rica ete... «Taun vaqtında ziyafet olmaz», dep ayttı iştirakçilerden biri... Qarar aman-aman bir ağızdan qabul etildi, bir kişi bitaraf oldı», – dep yazdı o Facebookta.
Qırımnıñ Rusiye ükümeti bu sene qırımtatarlarnıñ Hıdırlez bayramını mayıs 3-te Moskva artistleriniñ iştirakinen keçirmek istey.
Keçken sene Mustafa Cemilevni Moskva ava limanından Qırımğa kirsetmegenleri içün Meclis Hıdırlez bayramını lâğu etti.
Hıdırlez qırımtatarlarnıñ baar bayramıdır. Onı «quralay» (mayıs) ayınıñ birinci aftasınıñ cuma künü qayd eteler.
