Qırım akimiyeti Hıdırlez bayramını qırımtatar halqını bölmek içün qullana, – dep ayttı Qırımtatar Milliy Meclisiniñ reisi Refat Çubarov bazar künü, aprel 26-da, aydınlatılğan muracaatında, dep haber ete Qırım.Aqiqat.
«Milletimizni parçalamaq, küreş meydanlarından uzaqlaştırmaq içün, yapqan ve yapacaq cinayetlerni dünyadan saqlamaq içün Qırımdaki işğalciler ya da okkupantlar mayıs 3-te tantanalı şekilde Hıdırlez bayramınıñ keçirilmesini ilân ettiler ve buña azırlanalar. Bu aynecilikniñ manasını epiñiz yahşı añlaysıñız. Yazıqlar olsun, bu yapqan cinayetlerinde işğalciler aramızdan kendilerine oşağan bazı semetdeşlerimizni qullanalar», – dep ayttı Çubarov.
Qırımtatar Milliy Meclisiniñ reisi bildire ki, qırımlılar Qırımnı işğal etken «namussızlarğa bu pis oyunlarğa qoşmağa» fursatlar bermemek kerek.
Milletimizni parçalamaq, küreş meydanlarından uzaqlaştırmaq içün, yapqan ve yapacaq cinayetlerni dünyadan saqlamaq içün Qırımdaki işğalciler ya da okkupantlar mayıs 3-te tantanalı şekilde Hıdırlez bayramınıñ keçirilmesini ilân ettiler ve buña azırlanalarRefat Çubarov
«Epimiz kendimizge açıqtan cevap bereyik: qırımtatar gençleri qaçırılğan zamanda ve olardan bazıları öldürilgende, sayğılı liderimiz Mustafa ağamız ve onıñnen beraber Meclis reisi ve arqadaşlarımız İsmet Yüksel, Sinaver Kadırov vatanda yaşaması yasaqlağanda, Ahtem Çiygoz ve Ali Asanov apiste olğanda, ATR kanalımız ve diger milliy medialarımız qapatılğanda, iş adamlarımız er kün basqı altında olğanda, yüzlernen insanlarımız mahkemelerge ve sorğularğa çağırılğanda, bu cinayetçiler tarafından ötkerilecek Hıdırlez bayramına qoşulması olurmı?», – dep qayd etti o.
Refat Çubarov qırımlılarğa muracaat etip, qıyın vaqıtlar «illâ ki keçecegini» hatırladı ve sabırlı ve bir-birine diqqatlı olmağa çağırdı.
O, gençlerge milliy duyğular ve vatanperverlikni daa çoq aşlamaq kerek olğanını hatırlatıp, qırımtatar halqınıñ birligi ve namusını qorçalamağa çağırdı.
