Qırımtatar Milliy Meclis reisiniñ muavini İlmi Ümerov Qırımnıñ şimdiki Rusiye akimiyeti devlet hızmetçilerini mayıs 3 künü Bağçasarayda keçirilgen qırımtatar milliy «Hıdırlez» bayramına kelmege mecbur etkenini tüşüne. Bu aqta o Facebook saifesinde yazdı.
«Tabiiy ki, men tünevin «mecburiy hıdırlezde» yoq edim. «Akimiyet tarafından ohşalğan» qırımtatarlar kene bir kere aldatmağa aşıqtılar, kelgen insanlarnıñ sayısını 8-10 qat arttırıp, tedbirni «ayrette qaldırğan» kibi aytıp qoydılar. Böyleliknen olar sürgün etilgenlerniñ abadanlaştıruvı boyunca programmanıñ yoq olğanı aqta aytqan ediler (o 1992 senesinden itibaren bardır), acılıq aqqında: Qırım seyyaları ilk sefer acılıqqa bardı (acılıq ise Ukraina kvotaları boyunca 1997 senesinden yapıla) dey ediler, Qırımda qırımtatarlarğa nisbeten ayırım olmağanı aqta defalarca aytalar (tevqif, tintüv, sürgünlik, faallerniñ tuvğanlarına basqı, ticaret basqısı devam ete)», – yazdı Meclis reisiniñ muavini.
Ümerovnıñ sözlerine köre, «şimdiki akimiyetke oşap, «bizimkiler» (akimiyet organlarında olğan qırımtatarlar. – muar.) iqtisadiy-içtimaiy vaziyetniñ beterleşüvi, Qırım Rusiyege yaqınlaşmadı, daa da uzaq olğanını sanki bilmeyip, aldatıp yüreler».
«Hıdırlezge» qaytsaq…Devlet hızmetçilerini ve diger «zayıf» ve «tabi olğanlarnı» tedbirge qoşulmağa mecbur etmege qolay degil, amma siz becerdiñiz. Aqiqiy bayram ve tünevin olğannıñ arasında farq sevgi ve zulum arasındaki kibidir…», – dep qoştı o.
Ümerov şunı qayd etti ki, «Hıdırlez» yerinde o mayıs 3 künü ağa-qardaşları, bala ve torunları ile Mangup-qale eteginde piknik keçirdi.
Hatırlatamız, bazar künü, mayısnıñ 3-de, Hıdırlez bayramı «Şaherezada» medeniy-eglenceli merkeziniñ meydanında keçirildi (Bağçasaray rayonı, Aqmescit – Bağçasaray yolunıñ 25-nci kilometrinde).
Evel Qırım.Aqiqat haber etkeni kibi, Qırım ükümeti Hıdırlezge 40 biñ insannıñ qoşulması aqta ayta eken.
Qırım.Aqiqat bildirgeni kibi, Bağçasaray regional meclisiniñ toplaşuvında aprel 18-de Qırımnıñ şimdiki akimiyeti qırımtatarlarnıñ milliy bayramı Hıdırlez ile bağlı tedbirlerde iştirak etmemek qararı qabul etildi.
Qırımtatar Milliy Meclisiniñ reisi Refat Çubarov aprel 26-da aydınlatılğan muracaatında Qırım akimiyeti Hıdırlez bayramını qırımtatar halqını bölmek içün qullana, – dep aytqan edi.
