Qırımda Rusiyeniñ işğalci akimiyeti tarafından azırlanılğan Hıdırlezde qırımtatar milliy ruhu yerinde – özbek «sovogı», dep bildire Qırımtatar Milliy Meclisiniñ reisi Refat Çubarov. Bunı o Facebook saifesinde yaza.
«Keçken seneleri olğan tedbirlerniñ qırımtatar ruhu olmağan zayıf bir taqlidi… Amma «sovok» kibi şey pek çoq, ecnebiy, özbek <...> Esas sananıñ donatuvında qırımtatar milliy timsalleri yoq»,– dey Çubarov.
O şunı da yaza ki, qırımtatar iş adamlarını «Hıdırlezge» çıqıp, alış-verişke qoşulmağa mecbur etken ediler.
«Qırımdan kelgen soñ malümatqa köre, işğalci akimiyet tarafından azırlanılğan «Hıdırlezge» zar-zornen 5-6 biñ insannı toplap oldılar», – dey Çubarov.
Evel Qırım.Aqiqat haber etkeni kibi, Qırım ükümeti Hıdırlezge 40 biñ insannıñ qoşulması aqta ayta eken.
Qırım.Aqiqat bildirgeni kibi, Bağçasaray regional meclisiniñ toplaşuvında aprel 18-de Qırımnıñ şimdiki akimiyeti qırımtatarlarnıñ milliy bayramı Hıdırlez ile bağlı tedbirlerde iştirak etmemek qararı qabul etildi.
Qırımtatar Milliy Meclisiniñ reisi Refat Çubarov aprel 26-da aydınlatılğan muracaatında Qırım akimiyeti Hıdırlez bayramını qırımtatar halqını bölmek içün qullana, – dep aytqan edi.
