Qırımtatarlar içkini alğışlamasa da, Qırımnıñ işğalci akimiyeti içki satuvına sıñırsız irişimni açtı. Bunı Vesti ukrain radiosına Qırımtatar Milliy Meclis reisi Refat Çubarov bildirdi.
«Anda içki çoq olacaqtır. Bizde bu kibi tedbirlerde içki içilmey, amma bu sene akimiyet içkige sıñırsız irişimni açtı», – dedi Refat Çubarov.
Bundan da ğayrı, Qırımtatar Milliy Meclis reisi tedbirge mektep talebelerini ketirgenleri aqta bildire.
«Diger millet vekillerini ketireler. Aqyardan Rusiyelilerni ketirgenleri aqta haber keldi. Talebe, balalarnıñ sayısı çoqtır», – dey Çubarov.
Evel Qırım.Aqiqat haber etkeni kibi, Qırım ükümeti Hıdırlezge 40 biñ insannıñ qoşulması aqta ayta eken.
Qırım.Aqiqat bildirgeni kibi, Bağçasaray regional meclisiniñ toplaşuvında aprel 18-de Qırımnıñ şimdiki akimiyeti qırımtatarlarnıñ milliy bayramı Hıdırlez ile bağlı tedbirlerde iştirak etmemek qararı qabul etildi.
Qırımtatar Milliy Meclisiniñ reisi Refat Çubarov aprel 26-da aydınlatılğan muracaatında Qırım akimiyeti Hıdırlez bayramını qırımtatar halqını bölmek içün qullana, – dep aytqan edi.
