Qırımnıñ işğalci akimiyeti Dünyağa «Qırımda er şey yahşı» demege istey. Bunı Vesti ukrain efirine Qırımtatar Milliy Meclis reisi Refat Çubarov ayta.
O, insanlar bayramğa öz istegi ile kelmegenini bildire – Qırım ükümeti devlet şirketleriniñ hadimlerini Hıdırlezge barmağa mecbur ete.
«Akimiyet anda bütün Qırımdan insanlarnı ketirmek içün bayağı areket etkendir. Bizge insanlarımızdan anda er bir devlet şirketi, devlet müessise, devlet hızmetçileri içün kvota olğanı aqta haberler kele. Sıñırlar da bar, tabiiy ki, o (Qırımnıñ Rusiye akimiyeti – muar.) insanlarnıñ muayyen miqdarını toplar ve bunı tış alem içün nevbetteki teşviqat olaraq qullanır», – dey Çubarov.
Bunıñ ile bayramğa diger millet vekillerini de ketireler, dey Meclis reisi.
«Bugün Qırımnıñ işğalci akimiyeti bütün devlet müessise, şirket, hadimlerini celp etti. Maqsadı – işğalciler tarafından azırlanılğan tedbirge qırımtatarlarnıñ umumiy boykotı fonunda bayramnıñ taqlidini yapmaqtır», – dep yaza Facebookta Refat Çubarov.
Evel Qırım.Aqiqat haber etkeni kibi, Qırım ükümeti Hıdırlezge 40 biñ insannıñ qoşulması aqta ayta eken.
Qırım.Aqiqat bildirgeni kibi, Bağçasaray regional meclisiniñ toplaşuvında aprel 18-de Qırımnıñ şimdiki akimiyeti qırımtatarlarnıñ milliy bayramı Hıdırlez ile bağlı tedbirlerde iştirak etmemek qararı qabul etildi.
Qırımtatar Milliy Meclisiniñ reisi Refat Çubarov aprel 26-da aydınlatılğan muracaatında Qırım akimiyeti Hıdırlez bayramını qırımtatar halqını bölmek içün qullana, – dep aytqan edi.
