Link açıqlığı

Refat Çubarov: Qırım akimiyeti Qırımtatar Milliy Meclisini darma-dağın etmege istey


Qırımtatar Milliy Meclisiniñ reisi Refat Çubarov

2014 senesi mart ayından itibaren qırımtatar halqına nisbeten keçirilgen deşetli siyasetniñ soñki maqsadı qırımtatar halqınıñ tuvğan toprağında aq-uquqları içün ıntılışını ve küreşini bütünley bastırmaqtır. Bu aqqında Qırımtatar Milliy Meclisiniñ reisi Refat Çubarovnıñ beyanatında aytıla.

«Genç qırımtatarlarnı qaçıruv ve öldürüv, qırımtatar faallerini apiske aluv ve taqip etüv, Mustafa Cemilev, Refat Çubarov, İsmet Yüksel, Sinaver Kadırovnıñ Qırımda yaşamaq yasağı, Qırımtatar Milliy Meclisi ve «Qırım» Fondunıñ qanunsız alda elde etüv, camilerniñ tintüvi, dindar musulmanlar ve «narazılıq meydanları» iştirakçileriniñ taqipleri, jurnalistlerge basqı ve dünyada yekâne olğan ATR mustaqil qırımtatar telekanalını qapatmaq telükesi, mustaqil qırımtatar kütleviy haber vastalarınıñ ğayrıdan qayd etmemeleri, FSB hadimleriniñ Qırım sakinleri ile keçirilgen yüzlernen mecburiy «subetler», Qırımda cemaatnı akimiyetniñ qanunsızlığı ve areketlerine boysundırmaq içün keçirilgen barışıq numayış ve mitinglerniñ yasağı», – aytıla beyanatta.

Çubarov hatırlattı ki, Qırımtatar Milliy Meclisiniñ reis muavini olğan ve Refat Çubarovnıñ Qırımğa kiriş yasağından sebep Meclis reisiniñ vazifelerini eda etken Ahtem Çiygoz yanvar 29-da yaqalandı.

Bunı ömürge keçirmek içün Qırım Devlet şurasınıñ reis muavini Remzi İlyasov, milletlerara munasebetler ve sürgün olunğan grajdanlarnıñ işleri boyunca devlet komitetiniñ reisi Zaur Smirnov, Aqmescit şeer şurasınıñ muavini Teyfuk Gafarov ve Qırım yolbaşçısınıñ muavini Ruslan Balbek celp etildi

«Halqına ve Qırımtatar Milliy Qurultayınıñ printsiplerine sadıq olğan Ahtem Çiygoznıñ yaqalanmasından soñ Qırımda olğan vaqialar işğalci akimiyetniñ Qırımda üküm sürgen qanunsızlıq ve adaletsizlik şaraitlerinde bile faaliyeti qırımtatar halqınıñ aq-uquqları ve menfaatlarınıñ qorumasına yönelgen Qırımtatar Milliy Meclisiniñ darma-dağın etmesine başlağanını tasdıqlay», – dep qayd etti Refat Çubarov.

Onıñ aytqanına köre, Qırım akimiyeti «qırımtatar toplulığı ve Ukrainada, em de halqara toplulıqta qırımtatarlar tarafından saylanğan milliy idare organlar – Qırımtatar Milliy Meclisi ve Qırımtatar Milliy Qurultayınıñ – rolüni ve emiyeti yüksek olğanını añlap, Meclis erkânını «deñiştirmek» ve onıñ reberlerini «deñiştirmek» vazifesini berdi».

Bunı ömürge keçirmek içün Qırım Devlet şurasınıñ reis muavini Remzi İlyasov, milletlerara munasebetler ve sürgün olunğan grajdanlarnıñ işleri boyunca devlet komitetiniñ reisi Zaur Smirnov, Aqmescit şeer şurasınıñ muavini Teyfuk Gafarov ve Qırım yolbaşçısınıñ muavini Ruslan Balbek celp etildi.

Refat Çubarov hatırlattı ki, Remzi İlyasov, Zaur Smirnov ve Teyfuk Gafarovnıñ Qırımtatar Milliy Meclisinde azalığı Qırımtatar Milliy Qurultayınıñ reglamenti ve Meclis nizamnamesini bozğanlarından sebep toqtatılğan edi.

Qırımtatar Milliy Meclisiniñ azaları, qırımtatar milliy areketiniñ faalleri qırımtatar milliy areketiniñ baqışları ve qıymetlerini yoq etmege imkân bermezler

«Soñki aftaları İlyasov, Smirnov, Gafarov ve olarğa yaqın olğanlar saipleri Aksenov, Konstantinov, Belaventsevniñ avalelerini amelge keçirip, Qırımtatar Milliy Meclisiniñ azaları ve Qırımtatar Milliy Qurultayınıñ delegatlarına basqı yapıp, şantaj usulından faydalanaraq, Meclis toplaşuvını ötkermege ve işğalciler tarafından evelden azırlanğan qararnı qabul etmege mecbur etecek olalar», – aytıla Qırımtatar Milliy Meclisi reisiniñ beyanatında.

Bunıñ kibi qararlar arasında – Remzi İlyasovnıñ Qırımtatar Milliy Meclisiniñ reisi vazifesine «tayinlenmesi», em de halqara toplulıqqa «Qırımda Rusiye suverenitetiniñ tanılması» aqqında muracaat», – dep qayd etti Çubarov.

Meclis reisiniñ qayd etkenine köre, bunıñ kibi areketler ve qararlar uquq ceetinden iç bir şeyge yaramayıp, işke tüşürilmeycegi belli.

«Eminim, Qırımtatar Milliy Qurultayınıñ delegatları, Qırımtatar Milliy Meclisiniñ azaları, qırımtatar milliy areketiniñ faalleri qırımtatar milliy areketiniñ baqışları ve qıymetlerini yoq etmege imkân bermezler», – dep qayd etti Çubarov.

O, şunı da hatırlattı ki, yıl-yıldan fevral 23-te qırımtatarlar Aqyarnıñ eski apishanesiniñ binası yanında toplaşıp, «qırımtatar halqınıñ ulu oğlu Noman Çelebicihannı añğan ve kendi toprağında serbest yaşamaq aqqı oğrunda küreşken qırımtatarlarnıñ sadıqlığı aqqında ant etken ediler».

Malüm ki, Qırımtatar Milliy Meclisine fevral 22-de cemaat erbabı Noman Çelebicihannı añma tedbirini keçirmege izin bermediler.

Qırımtatar Milliy Meclisiniñ azası İlmi Ümerov işdeşlerine muracaatta bulunıp, Qırım akimiyeti ile Meclis reberligini deñiştirmek mevzusında bir de bir muzakereler keçirmemege rica etti. Onıñ malümatına köre, Qırım akimiyeti acele sürette qırımtatarlarnıñ temsil organınıñ reisi vazifesine spiker muavini Remzi İlyasovnı tayin etmege istey.

XS
SM
MD
LG