Qırımtatar Milliy Meclisinе fevral 22 künü cemaat erbabı Noman Çelebicihannıñ ölüm yıllığına bağışlanğan mitingni keçirmege ysaq ettiler.
Bunı Qırımtatar Milliy Meclisiniñ azası İlmi Ümerov bildirdi
«Noman Çelebicihannıñ hatırasına bağışlanğan mitingni keçirmege izin bermediler. Mitingni fevral 22 künü Hanlar sarayında keçirmege planlaştırıla edik. Bu kibi cevaplarğa endi alışmaq ve milliy uquqlarımız oğrunda küreşniñ diger şekillerini qıdırmaq kerek, ğaliba. Red ettiler, yaqında ise er kes tedbirniñ keçirilmesine izin berilecek dep ayta edi»,– yazdı o Facebook saifesinde.
Evel Meclis reisiniñ muavini Qırım.Aqiqatqa Qırımnıñ şimdiki akimiyeti ile qırımtatar erbabı Noman Çelebicihanğa bağışlanğan hatıra tedbirleriniñ keçirilmesi aqta mesele muzakere etilgenini bildirgen edi.
Qırım camilerinde qırımtatar erbabı hatırasına dua merasimlerini keçirecekler.
Noman Çelebicihan 1885 senesi molla qorantasında doğa. Bağçasaray, İstanbul, Sankt-Peterburgda oquy, qırımtatar yaşlarınıñ maarif ve inqilâbiy teşkilâtlarında iştirak ete. 20-nci asırnıñ başında eñ istidatlı qırımtatar edebiyatçısı olaraq tanıla. Qırımtatarlarnıñ milliy gimniniñ müellifi ola. 1917 senesi Fevral inqilâbından soñ Musulman icraiy komitetiniñ reisi, Qırım müfisi – soñra ise Birinci Qırımtatar Milliy Qurultayınıñ reisi ola. 1918 senesi yanvar ayında bolşevikler tarafından yaqalana, fevral 23 künü apiste deñizciler tarafından öldürile. 33 yaşında olğan müftiniñ cesedi deñizge atıla.
