Link açıqlığı

Ümerov qırımtatarlarnı akimiyetniñ Meclis reisini deñiştirmek teklifi ile razı olmamağa çağıra


İlmi Ümerov

Qırımtatar Milliy Meclis reisi İlmi Ümerov zenaatdaşlarını Qırım akimiyetiniñ Meclis reisini deñiştirmek teklifini muzakere etmemege çağıra. Onıñ malümatına köre, Qırım akimiyeti acele sürette qırımtatarlarnıñ temsiliy organı reisi vazifesine spiker muavini Remzi İlyasovnı tayinlemege istey.

Bunı Ümerov öz Facebook saifesinde yazdı.

Ümerov aytqanı kibi, Qırımnıñ şimdiki akimiyeti, şu cümleden onıñ terkibinde olğan qırımtatarlar da, Meclis ile utanmazca bir «işni» alıp bara. Onıñ malümatına binayen, eki kün evelsi Qırım akimiyetiniñ vekilleri Meclis azaları ile körüşti.

«Teklifleri şundan ibaret edi: acele (eki kün içinde) Meclis toplaşuvını çağırmaq, Mecliste İlyasov, Smirnov (Qırım Cumhuriyeti milletlerara munasebetler ve sürgün olunğan grajdanlarnıñ işleri boyunca «Devlet komitetiniñ» reisi) ve Gafarovnıñ (Qırım Devlet şurasınıñ milletlerara munasebetler boyunca komitetiniñ reisi) azalığınıñ toqtatılması aqta qararnı lâğu etmek ve eñ esası R.İlyasovnı Qırımtatar Milliy Meclis reisi vazifesine saylamaq (tayinlemek). İştu, böyle teklifler, menimce, şimdiki Qırım akimiyeti yolbaşçılarına ve olarnıñ qırımtatar tarafdarlarına has olğan tsinizminiñ eñ yüksek noqtasıdır», – dep yazdı Ümerov.

«Ümüt etem ki, Meclis azaları (azalığı toqtatılğan şahıslar da) bunı oqurlar, şunıñ içün muracaatta bulunam: razı olmañız, satılmañız, aks alda biz tarihqa halqını satqan Meclis olaraq kirermiz. Doğrusnı aytsam, becerip olamazlar, eminim, amma anda olğanlarğa ayıp», – dedi o.

Evel bildirilgeni kibi, Kefede Qırımtatar Milliy Meclisiniñ regional yolbaşçılığını deñiştirecek oldılar. Nezaretçilerniñ fikrine köre, deñiştirüvniñ teşebbüsçisi Devlet Şurasınıñ spiker muavini Remzi İlyasovnıñ «Qırım» areketi oldı. Qurultaynıñ Merkeziy saylav komissiyasında ketişatnıñ bozuluvı sebebinden saylav neticelerini tanımaylar. Mütehassıslar işbu areketlerde akimiyette olğan insanlarnıñ menfaatını köreler.

Qırımtatarlarnıñ yetekçileri – Mustafa Cemilev ve Refat Çubarovğa Rusiye tarafından işğal etilgen Qırım akimiyeti yarımada kirişini yasaq etti.

XS
SM
MD
LG