Lvov – Lvov sakinleriniñ Qırım aqqında fikirlerini matbuat vastaları tertip eteler. Yarımada aqqında pek çoq hurafe bar, faqat Or Qapunıñ o bir tarafına tek bir qaç Lvov sakini barıp keldi. Hurafelerni yoq etmek içün, Qırım, Lvov, Münhen ressamları YE 97 leyhası çerçivesinde öz foto resimlerini taqdim ettiler. Belki de, tamam bu leyha sayesinde Lvov ve Qırım arasında köpür qurlacaqtır.
«Lvov sakinleri qırım aqqında pek az bileler. Matbuat vastaları hurafelerni pekiteler, Qırım – yalı, paalı ayat ve haçapuri, deyler. Amma, biz Qırım deñizi, sıcaq ava ve sanat bergen ilk duyğularnen paylaşmağa istedik», – dey leyha teşkilâtçısı, ressam Aleksandra Davıdenko.
Qadın 8 yıl devamında Qırımğa qatnap, olacaq leyha içün resim çıqardı. Er sefer YE 97 avtomobil yolundan ketkeni içün, leyhanı da böyle adlandırdı.
Aleksandra Davıdenko aytqanı kibi, Lvovda bu leyha aqqında farqlı şeyler ayttılar. «Bazı adamlar, leyhanı yapmaq kerek degil dediler, çünki bu savrulmağan yara. Yara olsa da, onıñ aqqında ikâye etmege qarar aldıq», – dey ressam. O emin, yara aqqında laf etseñ, melemni bulursıñ. «Adamlar şimdi bu aqta laf etmege azır degiller, amma çette turıp olamaysıñ. Bunıñ aqqında laf etmek kerektir», – dey teşkilâtçı.
Ressam yarımadağa pek bağlı olğanını ayta. «Biz şimdi yapqanımız alçaq seviyede olmalı, pek eyecanlı işler bar. Belki de is etkenimiz şeyler degil. Amma, olğan şeylerden vazgeçip olamaymız, bunı kösteremiz», – dey qadın.
Aleksandra bu işke daa çoq adamnı celp etmege istey. «Mında çeşit sebeplerden köçip kelgenler öz leyhalarnı başlaylar, çünki bunda ihtiyac bar. Men bellesem, Qırımnıñ küçük art-yurtunı Lvovda azırlamaq mümkün», – dey Aleksandra.
KrolikowskiArt – nıñ foto leyhası
Aleksandr ve Aleksandra Krolikovskiye Qırımda vaziyet «hastalıqqa» oşağan soñ, yarımadanı terk ettiler. Aleksandrnıñ fikirince, Qırımda bir çoq adam delirdi. «Amma, hastalıqlar keçe-kete. Qırımda bu delilikte iştirak etmegen adamlar bar», – dey ressam.
Sergide, KrolikowskiArt teessisçileri 10 işini taqdim ettiler, episini Aqyarda 2014 senesi çıqardılar. Ressamlar eserlerni bala tüşlerine oşattırdılar. Aqyar tek «ruslarnıñ şüreti» ve «rus deñizciler» şeeri olmağanını kösterdiler.
Keç olsa da: medeniyet paytahtı yarımadanen dialog qura
Aleksandr Krolikovskiyniñ fikirince, Qırım ile Lvov arasında dialog evelden de üküm sürgen edi, amma, yerli seviyede. «Aqyarda misal içün Lvov ilimler akademiyası çalışa edi. Anda teşebbüsçiler ve yerli faaller seviyesinde sergiler yapıla edi», – dey Aleksandr.
Aleksandra aytqanı kibi, bu dialognı rusiyeli teşviqat toqtata edi. Sergi sayesinde bu dialog daa tez pekingenine işana. «Belki bu kerçekten de bir şans», – dey o. «Belki bu vaqialar olmasa edi, añlı olaraq biri-birimizge yaqınlaşmaz edik», – dey Krolikovskaya.
Qırım aqqında hurafeler
«Hurafeler – çoq tüşünmemek içün belgilengen işaretlerdir. Bu bir soy admlar içün. Başqalarına hurafeler aksine, tüşünmege keder etkenleri içün, mania qoyalar», – dey sergi musafiri Natalya Nebesnük.
Lvov sakininiñ fikirince, Qırım ve cenüp-şarqiy vilâyetleriniñ Ukrainağa qoşulmaq istemegenleri esas hurafedir. Çatırdağ üzerindeki ukrain bayrağı onı yoq ete.
Aynı zamanda, bazı hurafelerni resimler tasdiqlaylar. «Biz deñizcilerni, berektsiz sofralarnı, divarlarda yapıştırlğan kâğıtlarnı köremiz. Bu sovet devirine ait şeyler», – dey qadın.
Büyüp «köbek bağını üzmemek»
Sergi musafiri Yelizaveta Kuznetsova resimlerniñ «canlı» olğanını qayd etti. «Men yüzümnen tolu arabanı kördim, ve özümnişu yerde is ettim». Amma, bazı rsimlerni ressam teñqid etti. «Ukraina bayrağı ile resim çeşit duyğularnı asıl etti. Bu resimni ille tasvir etmek kerek. Onıñ aqqında bir şeyler aytmaq küç», – dey ressam.
Ressam Natalya Nebesnük sergi farqlı yaraştırılğanını qayd etti. Onıñ fikirince sanat, bütün bağlarnı tutıp, «köbek bağını üzmemege yardım eter».
Leyha «Cemaat faalliginiñ ustahanesi» programma çerçivesinde eda etile. Sergi iştirakçileri Aqmescit (Dinara Ahtemova), Aqyar (Aleksandr ve Aleksandra Krolikovskiye, Vitaliy Fomenko, Nadejda Terehina), Lvov (Aleksandra Davıdenko), Münhenniñ (Gerbert Romeç) vesilleridir.
Sergi noyabrniñ 2-ne kadar numayış etilecek.
