Mayısnıñ 18-nde qırımtatar halqı genotsidiniñ yıllığında Ukrainanıñ Türkiye elçihanesi matem şeritli qırımtatar bayrağını endirdi. Fotoresimni Ukrainanıñ Türkiye elçisi Andriy Sıbiğa Twitterde derc etti.
«Bugün qırımtatar sürgünliginiñ qurbanlarını ürmetnen añamız. 77 yıl evelsi Stalin rejimi insaniyetlilikke qarşı cinayet yaptı. Matem timsali olğan qara şeritli bayraq yarığa endirildi. Ukraina parlamenti bu sürgünni genotsid dep tanıdı», – dep yazdı Sıbiğa.
Bugün Kırım Tatar sürgününün kurbanlarını saygı ile anıyoruz. Zaman aşımı tanımayan insanlığa karşı işlenen bu suç 77 sene önce Stalin rejimi tarafından işlendi. Matemi simgeleyen siyah kurdeleli bayrak yarıya indirildi. 🇺🇦 Parlamentosu bu sürgünü soykırım olarak tanıdı. pic.twitter.com/sxgYHf4B0R
— Andrii Sybiha 🇺🇦 (@andrii_sybiha) May 18, 2021
Qayd etmeli ki, mayıs 18 qırımtatar genotsidiniñ qurbanlarını añma yılına Kanadanıñ New Brunswic vilâyetiniñ paytahtı Fredericton Ukrainanıñ Kanada elçihanesiniñ teşebbüsine qoşulıp, qırımtatar bayrağını köterdi. Bayraq Ukraina devlet bayrağınen beraber Fredericton meriyası ögünde asıldı.
Salı künü, mayısnıñ 18-nde, sovetler qırımtatarlarnı Qırımdan sürgün etip başlağanına 77 yıl tola. Ukraina ve dünyada qırımtatar halqı genotsidiniñ qurbanları añıla.
SEE ALSO: «Ölümden ğayrı er şey yasaq edi». Qırımtatarlarnıñ sürgünligini hatırlapKyivdeki «Qırım evinde» bugün «Tañ» («Svitanok») installâtsiyası açılacaq. Mayısnıñ 18-nde qırımtatar genotsidiniñ qurbanlarını añma tedbirlerinde Latviya Seyminiñ spikeri Ināra Mūrniece iştirak etmege niyetlene.
Qırımtatar Milliy Meclisi mayısnıñ 18-nde eglenceli tedbir keçirmemege çağırdı. «Qırımtatar resurs merkezi» ise «Genotsid olmasın!» adlı informatsion kampaniyanı başlattı.
Ukraina prezidentiniñ Qırım Muhtar Cumhuriyeti ve Aqyar temsilciligi ocalarnı ve gençlik merkezleriniñ ocalarını mayısnıñ 18-nde Qırımtatar halqı genotsidiniñ qurbanları hatırasına ders keçirmelerine çağırdı.
Mayısnıñ 18-i arfesinde qırımtatar faallerini polis tenbiledi.
Qırımtatar halqı genotsidiniñ qurbanlarını añma künü
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.