Qırımtatar faaliyetçisi Suleyman Kadırov, Kremlniñ kontroli altında bulunğan Kefe şeer mahkemesi tarafından qarar bildirilgen soñ, ceza muddetiniñ şartlı olğanına baqmadan, kene de siyasiy mabüstir. Bunı Qırım aq-uquq qorçalayıcıları gruppasınıñ idare başlığı Olga Skrıpnık, Qırım.Aqiqat içün bergen izaatlarında bildirdi.
Skrıpnık: «Biz, adamğa şartlı ceza berilgenini köremiz, lâkin buña rağmen, bizim hulâsalarımızğa ve em Ukraina, em de halqara aq-uquq qorçalayıcılarnıñ fikrine köre, adam siyasiy mabüstir, çünki onıñ azatlığı siyasiy sebeplerden dolayı sıñırlanacaq. Bu iş, tam bir siyasiy motivni daa bir kere tasdiqladı, imaye ise Kadırov yapqan areketleriniñ Rusiye qanunlarına zıt kelmegenini bir qaç kere isbatladı», – dep qayd etti.
Aq-uquq qorçalayıcısı, Qırımda, Qırım Ukrainağa ait denilgeni içün bu endi üçünci mahkeme qararıdır, dep qayd etti. Lâkin bundan evelki eki işten (Mıkola Semena ve İlmi Umerovnıñ işlerinden) farqlı olaraq bu sefer Suleyman Kadırovnı bunı söylegeni içün degil de, başqalarnıñ sözlerine bergen izaatları içün muhakeme ettiler.
«Bu sözler açıq bir halqara normalar, OON qararlarına esaslana, bu vesiqalarnı Rusiye devleti de tanıy. Akem ve bütün davanıñ mantığı bütünley bozuq. Demek, Suleyman Kadırovnı kibi bütün qalğanlarnı ve şu cümleden Qırım Ukraina olğanına işaret etken halqara topluluğını da muhakeme etmek kerek», – dep ilâve etti o.
Kremlniñ kontroli altında bulunğan Kefe şeer mahkemesi martnıñ 1-nde qırımtatar faaliyetçisi Suleyman Kadırovnıñ işi boyunca qararını ilân etti. Mahkeme oña şartlı olaraq eki yılğa azatlıqtan marum etüv ve bu muddet içünde cemiyet içinde faaliyet köstermekni yasaq etüv cezasını tayin etti.
Fevralniñ 28-nde Rusiye prokurorı Suleyman Kadırov içün şartlı olaraq üç yılğa azatlıqtan marum etüv ve cemiyet içünde faaliyet köstermekni yasaq etüv cezasını istedi.
2016 senesiniñ oktâbrinde Rusiye telükesizlik hadimleri qırımtatar faaliyetçisi Suleyman Kadırovnıñ evini tintmek içün keldi ve ondan noutbuk ile telefonını aldılar. 2016 senesi oktâbrniñ 11-nde Kadırov separatizmden şübheli tanılıp, oña qarşı cinaiy iş açıldı.
Qabaatlavnıñ versiyasına köre, Kadırov 2016 senesi martında, özüni Aqmescitten bir qırımtatar olaraq tanıtqan ve Ukrainanıñ kontroli altında bulunmağan Donetsk ve Lugansk vilâyetlerini azat etmek içün «Qırım» batalyonınıñ meydanğa ketirilmesi aqqında bildirgen nasıldır Demyan Demyanenkonıñ videoroligini repost yaptı. Bir qaç aydan soñ repostnıñ altında, içinde, cümleden, «Qol tutam, Qırım evelden de, şimdi de ve kelecekte Ukraina olacaq» sözleri olğan Kadırovnıñ izaatı peyda oldı. Oña qarşı Rusiye Cinaiy kodeksiniñ 280.1 maddesi boyunca iş açıldı. Qabaatlav FSB ekspertleri tarafından yapılğan ve Kadırovnıñ izaatında Rusiyeniñ topraq bütünliginiñ bozulmasına davet olğanını isbatlağan ekspertizağa esaslana.
2017 senesiniñ aprelinde Rusiyeniñ maliy monitoringi boyunca hizmeti Kadırovnı ekstremistler ve terroristler cedveline kirsetti.
Kadırov özü, cinaiy işi – öz noqtai-nazarını faal surette ifade etkenine ve aq-uquqnı qorçalav saasındaki faaliyetlerine cevaben mahsus hizmetler tarafından yapılğan provakatsiyadır, dep iddia ete.