Fevralniñ 28-nde Kefe şeer mahkemesi, Rusiye topraq bütünligini bozma çağıruvında qabaatlanğan qırımtatar faali Suleyman Kadırov içün prokuror üç yıllıq şartlı apis cezasi berilgenini istedi.Bu aqta Qırım.Aqiqatqa Azatlıq Radiosınıñ muhbiri haber etmekte.
Mahkeme munaqaşalarınıdan evel Kadırovnıñ işinen bağlı mahkemede reislik yapqan mahkemeci Anastasiya Şapoval, iş materiallarına BMT Havfsızlıq Şurası ve Ukrainanıñ, Qırımnıñ kimge ait olğanını tasdıqlağan ve 2014 senesi baarde Rusiyeniñ Qırımnı qanunsız şekilde ilhaq etip aluv areketlerine qıymet kesken Avropa Birligi organlarınıñbütün qararlarını ilâve etti.
Ondan da ğayrı iş materiallarına, Ukraina territorial bütünliginiñ garantiyası olğan Budapeşt memorandumı, ayrıca sıñır Keriç boğazından keçkenini köstergen, Ukraina ve Rusiye arasındaki sıñır aqqında añlaşması ilâve etildi.
Bu arada mahkemeci matbuatta prezdentlikke namzet Kseniya Sobçaknıñ Qırımnıñ kimge ait olğanı aqqındaki beyanatını iş materiallarına qoşıp oturmadı.
2016 senesi oktâbrniñ 5-nde rusiyeli küç idaresiniñ hadimleri qırımtatar faali Suleyman Kadırovnıñ evine tintüv keçirmege kelip, onıñ bilgisayar ve telefon tutıp alğan ediler. Kadırov Rusiye sıñırlarını tanımayuv ve «Asker» vatandaşlar birleşmesine qol tutuvda qabaatanğan edi.
2016 senesi oktâbrniñ 11-nde Kadırovğa qarşı separatizmde qabaatlav esasında cinaiy iş açıldı. 2017 senesi aprel ayında rusiyeli maddiy monitoring hızmeti Kadırovnı ekstremist ve terroristler cedveline kirsetti.
Kadırov cinaiy işni – onıñ cemaat faali sıfatındaki noqta-i nazarı ve uquqimaye faaliyetine qarşı mahsus hızmetler tarafından berilgen provokatsion cevap olğanını iddia ete.
