Kreml nezareti altındaki Kefe şeer mahkemesi martnıñ 1-nde qırımtatar faali Suleyman Kadırovnıñ ükümini ilân etti. Mahkeme onıñ eki yıllıq şartlı apis cezasına mahküm eterek, aynı muddet zarfında cemaat faaliyetnen oğraşmaqnı da yasaqladı. Bu aqta rusiyeli Azatlıq Radiosı hızmetiniñ muhbiri haber etmekte.
Ükümni Kefe şeer mahkemesiniñ mahkemecisi Anastasiya Şapoval ilân etti.
Muhbirniñ sözlerine köre Suleyman Kadırov Facebookta «Qırım – Ukraina toprağı. Er zaman sayıldı, sayıla ve sayılacaq» dep bergen izaatında Rusiye topraq bütünligini bozma çağıruvlarında qabaatlı dep tanılğan. Mahkemeci Şapoval «Qırım Rusiyeniñ bir qısmı olğanını ve öz topraq bütünligini qorçalamağa mecbur olğanını» qayd etti.
Fevralniñ 28-nde rusiyeli prokuror Suleyman Kadırovqa üç yıllıq şartlı apis cezası berilgenini ve cemaat faaliyeti yasaqlanğanını istegen edi.
2016 senesi oktâbrniñ 5-nde rusiyeli küç idaresiniñ hadimleri qırımtatar faali Suleyman Kadırovnıñ evine tintüv keçirmege kelip, onıñ bilgisayar ve telefon tutıp alğan ediler. 2016 senesi oktâbrniñ 11-nde Kadırovğa qarşı separatizmde qabaatlav esasında cinaiy iş açıldı.
Qabaatlağan tarafnıñ versiyasına köre, Kadırov 2016 senesi mart ayında, özüni Aqmescitli qırımtatar dep tanıtqan em de Donetsk ve Lugansk vilâyetleriniñ Ukraina nezareti tışında qalğan bölgelerini azat etmek içün «Qırım» batalyonı teşkil etilgeni aqqında beyan etken Demyan Demyançenko degen bir şahısnıñ videoroligini paylâşqan.Bir qaç aydan soñ paylâşuv tübünde «Qol tutam? Qırım Ukraina toprağı sayılğan edi, sayıla ve sayılacaq» degen sözlerinen Kadırovnıñ izaatı peyda olğan. Oña qarşı Rusiye Cinayet kodeksiniñ 280.1. maddesine köre cinayet işi açılğan edi. Qabaatlav, Kadırovnıñ izaatları Rusiye topraq bütünligini bozma çağıruvlarınen bağlı olğanını isbatlap, FSB ekspertleri keçirgen ekspertizağa esaslana.
2017 senesi aprel ayında rusiyeli maddiy monitoring hızmeti Kadırovnı ekstremist ve terroristler cedveline kirsetti.
Kadırov cinaiy işni – onıñ cemaat faali sıfatındaki noqta-i nazarı ve uquqimaye faaliyetine qarşı mahsus hızmetler tarafından berilgen provokatsion cevap olğanını iddia ete.
