Kezlevde Ali İbragimovnıñ evinde keçirilgen tintüv yekünlendi, eki büyük oğlu Mustafa ve Abdulla İbragimovlarnı Rusiye quvetçileri belli olmağan yerge alıp ketti.
Bu aqta «Qırım birdemligi» cemaat birleşmesi Qırım.Aqiqatqa bildirdi.
Evden ğayrı, Rusiye quvetçileri İbragimovlarğa ait tükânda da «tahqiqat tedbirlerini» keçire.
SEE ALSO: Qırım.Aqiqat yañartılğan haber qullanımını taqdim eteAdvokat Edem Semedlâyevniñ faallerge bildirgenine köre, Rusiye quvetçileri onı evge kirsetmedi. Advokat bunı «qanun bozuluvı» dep adlandırdı.
«Kelgeninen kirmege tırıştım, lâkin uquq qoruyıcı organlarınıñ hadimleri meni sert bir şekilde kirsetmedi. Beklememni istediler. Vatandaşnıñ uquqiy yardım aqqı bar, şunıñ içün bu qanun bozuluvı ola. Menim zenaat faaliyetime de mania yapıla», – dep aytıla haberde.
Advokat, işbu tintüv vaqtında Rusiye quvetçileriniñ areketleri qanunsız tanılsın dep, Qırım prokuraturasına muracaat etmege niyetlene, dep ayttı.
«İleride (polis – QA) hadimleriniñ bütün areketleri qanunsız tanılsın dep, Qırım prokuraturasına zenaat faaliyetime keder etilgenine dair şikâyet berecem».
Hatırlatamız, iyülniñ 22-nde saba Rusiye quvetçileri 57 yaşında Ali İbragimov ve 27 yaşında oğlu Mustafa İbragimovnıñ evini tintip başladı. Daa soñra Ali İbragimovnıñ evine acele yardım maşinası keldi.
Rusiye quvet müessiseleri vaziyetni açıq şekilde izaatlamay.
Qırım Muhtar Cumhuriyeti ve Aqyar prokuraturası Rusiye quvetçileriniñ Kezlevde 57 yaşında Ali İbragimov ve 27 yaşında oğlu Mustafa İbragimovnıñ evinde keçirgen tintüvleri sebebinden cinaiy tahqiqat başlatıldı, dep bildirdi.
Bundan evel Ukraina ombudsmanı Lüdmila Denisova halqara toplulıqnı Rusiye quvetçileriniñ yapqanlarına cevap bermesine çağırdı.
Qırımtatar Milliy Meclisiniñ reisi Refat Çubarov Rusiye quvetçileriniñ Kezlevde qırımtatarı Ali İbragimovnıñ evinde keçirgen tintüvini «qırımtatarlarnı ayrı qorquzuv şekli» ve «esas insan aqlarını ihmal etüv» dep adlandırdı.