Link açıqlığı

Saatnıñ esas haberi

«Tekrar küçlü bir zelzele olsa, Yalta yıqılır» – ekspertler Qırımda yañı qurulğan binalarnıñ zelzelege dayanıqlığı aqqında ayta


Yalta. Massandra yalısı
Yalta. Massandra yalısı

Fevralniñ 6-da Türkiye ve Suriyede olğan ve 40 biñden çoq insannıñ ölümine sebep olğan zelzeleler qırımlılarnı qorquzdı. İnsanlarnı işğalden soñ Qırımda çoq qurulğan yañı binalarnıñ zelzelege dayanıp-dayanmağanı qasevetlendire.

Qırım akimiyeti qırımlılarnı tınçlandırmağa aşıqtı. Kreml kontrolindeki Qırım ükümetiniñ mesken siyaseti ve devlet qurucılıq nezaretiniñ naziri Nikita Tarasovnıñ aytqanına köre, «Qırımdaki inşaatlar daa ekspertiza vaqtında zelzelege dayanğanı ceetinden mıtlaqa teşkerile».

«Qurucılıq iznini alğan bütün obyektler mıtlaqa ekspertizadan keçe, zelzelege uyğun qurulması temin etile. Bütün qurdurıcılar bu meselege büyük diqqat ayıra», – dep bildirdi «Radio Krım» yayınında Tarasov.

Onıñ malümatına köre, «al-azırda qurulğan bütün obyektlerni seysmologik talaplarğa uyğun olıp-olmağanını teşkermege imkân berecek devlet programması federal seviyede azırlanacaq».

Bir vaqıtları Qırım Muhtar Cumhuriyetiniñ milletlerara munasebetler ve sürgün etilgen vatandaşlarnıñ meseleleri cumhuriyet komitetiniñ reberi olıp çalışqan qırımlı faal Edem Dudakovnıñ fikirince, nazirniñ aytqanları cemaatnı tınçlandırmamalı.

Qurucılıq şirketi litsenziyanı satın ala bilse, qurucılıq keyfiyeti nasıl olsun

«Nazariyede er şey yahşı. Amma amelde GASK hızmetlerinde tanışlarıñ olsa, izinni satın almaq mümkün, çünki böyle «yımşatuvlarda» çoq para tutumlı masraf etile. Qurucılıq işi qabarcılıq qaynay, mında tenderler ecnebiylerge berilmey. Bundan ğayrı, qurucılarnıñ idare teşkilâtını quruv tecribesi köstergeni kibi, qurucılıq işleri içün litsenziya bergen raqip şirketler qurucılıq şirketlerini celp etmek içün bu litsenziyalarnı talaplarğa uymayıp bergen edi. Şunıñ içün leyha keyfiyetiniñ seviyesinden ğayrı, qurucılıq keyfiyetiniñ seviyesine emiyet bermek kerek. Qurucılıq şirketi litsenziyanı satın ala bilse, qurucılıq keyfiyeti nasıl olsun? Bağçasaray han sarayınıñ restavratsiyası er şeyniñ örnegidir. Şunıñ içün bir sıra problem bar. Nazir er şey yahşı ve telükesiz dey, amma «er vaqıt kibi» ola bile», – dep izaatladı vaziyetni Qırım.Aqiqat faali.

Yaltanıñ eski şeer havuzı yanında qurulğan yüksek bina, 2018 senesi noyabrniñ 13-ü
Yaltanıñ eski şeer havuzı yanında qurulğan yüksek bina, 2018 senesi noyabrniñ 13-ü

Rusiye Cemaat palatasında iş tecribesi olğan mimar ve cemaatçı Olga Veçerniñ Qırım.Aqiqatqa bildirgenine köre, onıñ Qırımda yañı qurulğan binalarnıñ zelzelege dayanacağınen bağlı şübheleri bar.

Şimdiki leyha ve qurucılıq keyfiyeti Qırımdaki binalarnıñ zelzelege dayanuvını bütünley temin etmey
Olga Veçer

«Şimdiki leyha ve qurucılıq keyfiyeti Qırımdaki binalarnıñ zelzelege dayanuvını bütünley temin etmey, dep tüşüne bilem. Hususan Qırımnıñ cenübiy yalısınıñ yüksek seysmik telükesini köz ögüne alsaq, mında eñ yüksek standartlarğa uymalı. Meselâ, Yaponiyada eñ küçlü zelzeleler bile yañı binalarnı yıqmay, çünki anda kimse insanlarnıñ ayatını telükege oğratmay ve leyha ve qurucılıqta para hırsızlamay. Türkiyede ise qurucılıq biznesiniñ binalarnıñ zelzelege dayanamaycağını aytqan leyha reberleriniñ talaplarına riayet etmegenini bilem. Rusiyede de aynısı yapıla», – dep bildirdi cemaatçı.

Zelzeleden soñ yıqılğan bina üstünde turğan er adamı. Hatay, Türkiye, 2023 senesi fevralniñ 7-si
Zelzeleden soñ yıqılğan bina üstünde turğan er adamı. Hatay, Türkiye, 2023 senesi fevralniñ 7-si

Sudaqlı bloger Aleksandr Smolovnıñ fikirince, Qırımda qurucılıqnıñ dayanıqlıq vaziyeti qasevet doğura.

«Nazirniñ eminliginden pek şübhelenem! Qırımda qabarcılıq qavğaları olğan, müddetke riayet etmeme ve leyhaları o yerge barmağan bir şirket mütehassısları tarafından yapılğan bir sıra FTSP obyekti bar! Sudağımda yahşı bir örnek bar – sürgün etilgenler içün 72 daireli bir bina, zelzeleden evel de yıqılmağa azır. Şahsiy sektor da problemli, leyha almaq ve ev qurmaq – kerçek olamaycaq bir şey, olğanından yapqan ve soñra qanunlaştırmaq ya da vesiqasız yaşamaq daa qolay. Böyle misaller çoq, kontrol etken organlar oğraşmalı», – dep bildirdi Qırım.Aqiqatqa bloger.

Sürgün etilgenler içün Rusiye programması çerçivesinde qurulğan ev, Keriç, 2019 senesi noyabr ayı
Sürgün etilgenler içün Rusiye programması çerçivesinde qurulğan ev, Keriç, 2019 senesi noyabr ayı

Aluştalı faal Pavel Stepançenko küçlü zelzele olsa, hususan yalı boyunca çoq bina yıqılır, dep qayd ete.

«Qırımnıñ Cenübiy yalısında topraqnı öz başına zapt etüv çoq, qurucılıq izinsiz ve ileride mahkeme vastasınen ya da memurlarnen obyektni işletüv añlaşması maqsadınen yapıla. Qabarcılıq qavğalarınen belli şimdiki akimiyette nasıl «añlaşqanları» zaten belli. Qırımnıñ Cenübiy yalısında şeritli temellerde beş qatlı garajlar da quruldı, anda zelzelesiz bulunmaq da telükeli ola. 1927 senesi Yaltada küçlü bir yer teprenüvi oldı, amma o vaqıt binalar anda-mında qurulmağan edi. Şimdi tekrar küçlü bir zelzele olsa, Yalta birden yıqılır, dep tüşünem», – dep qayd etti Qırım.Aqiqatqa faal.

Qırımnıñ Cenübiy yalısında şeritli temellerde beş qatlı garajlar da quruldı, anda zelzelesiz bulunmaq da telükeli ola
Pavel Stepançenko

1999 senesi olğan zelzeleden soñ Türkiye sert qurucılıq normalarını kirsetti. Lâkin yerli muhalifet tarafdarları qurucılıq qaidelerine er vaqıt riayet etilmedi ya da pek yımşatıldı, dep bildire.

Qırımda yüz yıl evelsi sekiz baalı bir zelzele olğan edi, şunıñ içün zelzeleşınaslar mında bayağı küçlü yer teprenüvlerini bekley, dep tüşüne Ukrayına ilimler akademiyasınıñ ilmiy hadimi Dmıtro Grin.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

Qırımnıñ Rusiye tarafından işğal etilüvi

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG