Vaqtınca işğal etilgen Zaporijjâ atom elektrostantsiyasındaki yanğın dünyada rusiyeliler kontrol etmege devam etken Ukrayina atom elektrostantsiyasınıñ telükesizliginen bağlı ciddiy qorqular yarattı. Bu aqta Amerikanıñ Sesi (maqalede Reuters malümatı da qullanıla) yaza.
MAGATE Zaporijjâ atom elektrostantsiyasına qarşı «ücüm» sebebinden özek telükesizlik içün havflar aqqında tenbiledi.
Agentlik ekspertleri stantsiyada bir qaç patlav eşitti ve qoyu bir tuman kördi, dep haber etti. MAGATE radiatsiya seviyesi artqanını qayd etmedi.
Ukrayina ve Rusiye stantsiyadaki yanğında bir-birini qabaatlay.
Dnipropetrovsk vilâyeti arbiy memuriyetiniñ yolbaşçısı Serğiy Lısaknıñ Telegramda bildirgenine köre, avgust nıne 12-nije yanğın toqtadı. «Nikopolde radiatsiya seviyesi artmadı. Vaziyetni kontrol etemiz», – dep qoştı memur.
Stantsiya Rusiye kontroli altında qalğan vaqıtta özek qaza telükesi «qorqunç bir kerçek» ola. Böyle sözlernen Estoniya Tış işler naziri Margus Tsahkna vaziyetni izaatladı.
«Ukrayina topraq bütünligi ğayrıdan tiklengenine ve Avropanıñ end büyük atom obyekti olğan Zaporijjâ atom elektrostantsiyası üzerinde kontrol Ukrayinağa qaytarılğanına qadar özek qaza telükesi qorqunç bir kerçek olıp qalacaq», – dep tüşüne Tsahkna.
«Özek telükesizlik seviyesine tesir yoq», – dep işandırdı MAGATE baş müdiri Rafael Grossi. O, yanğın mesüliyetini iç bir tarafta yüklemedi, lâkin «mesülietsiz ücümler stantsiyanıñ özek telükesizligi havflarını ve özek qaza risklerini arttıra. Acele toqtatılmalı».
MAGATE ekspertleri suvutma qullesine kirip, qıymet kesmek içün muracaat yolladı. Stantsiyanıñ altı reaktorı toqtatıldı ve zararlar telükesizligine doğrudan tesir etmeycek, amma ateş telükesizlik içün müim olğan obyektlerge tesir ete bile.
MAGATE, stantsiyada radiatsiya seviyesi deñişmedi, dep tasdıqladı.
Rusiye ve Ukrayina yanğın sebebinden bir-birini qabaatladı. Rusiye Tış işler naziriniñ vekili Mariya Zaharova Ukrayinanı stantsiyanı bozmaq ve «özek terror» yapmaq ıntıluvlarında qabaatladı.
Ukrayina Rusiyeni atom elektrostantsiyasını ateşke bergeninde qabaatladı. «Rusiye işğalcileri Zaporijjâ atom stantsiyasında yanğın çıqardı», – dep yazdı Ukrayina prezidenti Volodımır Zelenskıy içtimaiy ağlarda ve stantsiyanıñ suvutma qullelerinden birinde qara tuman körüngen videonı tarqattı.
«Rusiye terroristleri atom stantsiyasını kontrol etken vaqıtta vaziyet normal degil ve olamaz. Rusiye Zaporijjâ atom elektrostantsiyasını zapt etken ilk kününden başlap onı Ukrayina, Avropa ve dünyanı şantaj etmek içün qullana. Dünya ve MAGATE cevabını bekleymiz. Rusiye cezasını çekmeli. Bütünley telükesizlikni tek Zaporijjâ stantsiyasınıñ Ukrayina kontroline qaytması kefil ete bile», – dep qoştı Zelenskıy.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
