Ukrayina prezidenti Volodımır Zelenskıy Rusiye arbiyleri işğal etken Zaporijjâ atom elektrostantsiyasında yanğın çıqardı, dep bildirdi.
«Energodar. Nikopolden qayd etemiz ki, Rusiye işğalcileri Zaporijjâ atom stantsiyasında yanğın çıqardı. Radiatsiya şimdilik qararda qala. Amma Rusiye terroristleri atom stantsiyasını kontrol etken vaqıtta vaziyet normal degil ve olamaz. Rusiye Zaporijjâ atom elektrostantsiyasını zapt etken ilk kününden başlap onı Ukrayina, Avropa ve dünyanı şantaj etmek içün qullana», – dep aytıla Zelenskıynıñ Telegramında avgustnıñ 11-nde aqşam.
Onıñ qayd etkenine köre, Ukrayina dünya ve MAGATE cevabını bekley. «Rusiye cezasını çekmeli. Bütünley telükesizlikni tek Zaporijjâ stantsiyasınıñ Ukrayina kontroline qaytması kefil ete bile», – dep qoştı prezident.
Nikopol rayonı arbiy memuriyetiniñ yolbaşçısı Yevğen Yevtuşenkonıñ Telegram kanalında bildirgenine köre, «qarşı taraftaki menbalardan kelgen resmiy olmağan mlayumatqa köre», Rusiye quvetleri suvutma qullesinde «büyük sayıda» maşina şinalarını yaqtı.
«Provokatsiya ya da eski suv anbarınıñ sağ tarafındaki mesken yerlerde telâş çıqarmaq ıntıluvı ola bile. Zaporijjâ atom elektrostantsiyası, bu vaziyette mümkün olğanı qadar, eskisi kibi çalışa», – dep yazdı Yevtuşenko.
Dnipropetrovsk vilâyeti arbiy memuriyetiniñ yolbaşçısı Serğiy Lısak bildirgenine köre, vaziyet «kontrol altında tutula», «bütün mesüliyetli hızmetler» celp etildi.
«Ava ölçevleri radiatsiya seviyesi artmağanını kösterdi. Toqtamayıp baqıla. Yerli sakinlerden tınç qalmağa rica etem. Rusiye terror, şantaj ve qorquzuvlarnı qullanmağa devam ete. Bugün Zaporijjâ atom elektrostantsiyası çıqarğan yanğınları da bunı isbatlay», – dep yazdı o, Telegramda.
Zaporijjâ atom elektrostantsiyasında yanğınnı Rusiye tarafından Zaporijjâ vilâyetindeki işğalci memuriyetniñ yolbaşçısı Yevgeniy Balitskiy izaatladı. O, Ukrayina arbiylerini qabaatladı.
«Al-azırda stantsiyanıñ altı energobloku suvuq qala, buv patlavı telükesi ve diger aqibetleri yoq. Atom elektrostantsiyası ve Energodar şeeri etrafında radiatsiya seviyesi artmadı», – dep bildirdi Balitskiy.
Zaporijjâ atom elektrostantsiyası – Avropanıñ eñ büyük atom elektrostantsiyasıdır. Rusiye ordusı Energodar şeerini ve oña yaqın Zaporijjâ atom elektrostantsiyasını 2022 senesi mart ayınıñ başında işğal etti. 2023 senesi sentâbr ayında «Energoatom» prezidenti stantsiyada 822 ukrayinalı atomcı çalışmağa devam ete, dep bildirdi. Ukrayina Rusiye işğalcilerini stantsiya hadimlerini hırsızlağanında ve işkencege oğratqanında çoq qabaatladı.
Stantsiya ara-sıra ateşke oğray, Ukrayina ve Rusiye bir-birini qabaatlaylar. Ukrayina akimiyeti Rusiye ordusı Zaporijjâ atom elektrostantsiyasını arbiy tehnikasını saqlamaq ve arbiylerini yerleştirmek içün qullandı, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
