Qırımnıñ rusiyeli akimiyeti koronavirus şübelilerniñ nezareti içün yañı observatorlanı azırlamaq kerek olğanını ayta.
Bunı aprelniñ 25-inde Qırımnıñ Rusiye baş nazir muavini Yelena Romanovskaya ayttı.
"Qoşma observatorlarnıñ açılması meselesini muzakere ete edik, çünki böyle ketişatnen yerler yetmeycek, başqa sanatoriylerde observator açılmasını nazardan keçirecekmiz", - dedi Romanovskaya.
Qırımnıñ rusiyeli başı Sergey Aksönov kelecek aftanıñ başına qadar obsevator olaraq qullanıla bilecek sanatoriylerniñ cedvelini azırlamağa buyurdı.
"Bazaertesi kününece observator yapmasına lâyıq bütün yerlerni cedvelge kirsetmek, biz olarnı qayd etermiz. Neticede yeterli olmalı", - dedi o.
Aqmescit klinik hastahanesi koronavirus hastaları qayd etilgeni sebebinden aprelniñ 24-nden berli qapalıdır.
Daa evel Qırımnıñ Rusiye yolbaşçısı Sergey Aksenov, aprelniñ 24-nde 10 koronavirus hastası qayd etilip, rekord oldı, dep bildirdi. Qırımda 67 koronavirus hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
