Qırım matbuatı çoqusı alda yarımadadaki koronavirus infektsiyası aqqında, bundan ğayrı özüni izolâtsiya etüv rejiminiñ sertleşmesi aqqında yaza.
"Qırım aqiqatı" gazetası "Yeñilmez ğamsızlıq" maqalesinde, "koronavirus infektsiyası yarımadada daa tez yayılıp başlağanını" qayd ete. "Esas sebep - adamlarnıñ öz sağlığına ve bütün dünyanı qaplağan felâketke mesuliyetsiz munasebettir. Adamlar alâ daa yarımadağa epidemiologiya baqımından yaramay olğan ülke ve bölgelerden kele ve ne kelgenleri aqqında akimiyetke bildirmek, ne de başqalarnıñ telükesizligi içün özüni izolâtsiya etmek kerekli saymaylar", - yaza gazeta. Matbuat yazğanına köre, şimdi er kün yañı infektsiya adiseleri qayd etile: "Episi ya da ketirilgen, ya da kelgenlernen qonuşqanlar. Em de testlerniñ episi degil hastalıqnı birden kösterip olğanı belli oldı. Böylece, yaqında aşkâr olğan hastalıq adisesi yalıñız üçünci teşkerüvden soñ tasdıqlandı. Ondan evel olğan eki testlerniñ menfiy neticeleri edi".
"Komsomol aqiqatı. Qırım" "Eski telüke, yañı sıñırlavlar" maqalesinde yarımadada koronavirus infektsiyasınıñ yayılması ile bağlı yañı sıñırlavlar aqqında malümat bere. "Aprelniñ 14-ünden başlap Qırımğa vahta usulınen çalışqan qurucılar yiberilmeycek. Bundan ğayrı, cenazelerden ğayrı, mezarlıqlarnıñ ziyaret etmemek tevsiye etile. 65 yaşından büyük adamlarğa ve hronik hastalıqları olğan adamlarğa tışarığa çıqmaq yasaqtır. Sağlıq ve yaşayışqa telüke olğan vaziyetler, erzaq satın alınması ve ayvanlarnıñ kezindirmesi istisnadır. Bu qıyın vaqıtta işini devam etken esli adamlar mahsus keçit vesiqasını almalı", - yaza matbuat. Bunıñnen beraber bazı qolaylaşmalar bar, dep qayd ete matbuat. Qurulış şirketlerini, köy hocalığı mahsulatınıñ istisalınen bağlı şirketlerni çalışmağa izin berilgen işhaneleriniñ cedveline kirsettiler. Bundan ğayrı, balıqçılıq saasınen bağlı şirketlerniñ ve matbuatnıñ çalışmasına razılıq bar.
"Komsomol aqiqatı. Aqyar" gazetası Qırımda endi 11 yıl yaşağan yerli italyan iş adamı Roberto Lelli ile intervyüni bastırdı. Aqyarda o dondurma sata ve merkeziy bazarda italyan restorannıñ saibi ola. Gazeta yazğanı kibi, pandemiya başlamazdan evel Roberto Lelli vatanını Riyeti şeerini ziyaret etti. Anda yañı yıl bayramlarına barıp, Roberto fevralniñ başında Aqyarğa qayttı. "Ülke tamamınen qarışıq, - dedi Roberto matbuatqa. - İtaliyanıñ şimalinde bir çoq adam hasta. Ve sade vatandaşlardan ğayrı, ekimler de hasta. Ükümet yıl-yıldan tibbiyetke para ayırmasınıñ eksiltüvi buña sebeptir. Aqça yoq - mütehassıslar ve donatma yoq. Atta maska ve qoruyıcı köstümlarnıñ da olmağanına qadar bardı. Nasıl yani? Ne içün? Menim bu suaallerge cevabım yoq. İş adamı şeer sakinlerine evde oturıp, bütün talaplarğa uymağa muracaat etti: "Evden çıqsaq, Aqyar Lombardiyağa çevirilir. Ellerni çoqça yuvmaq kerek olsa - yuvuñız. Bir-biriñizden bir metrlik mesafede turmaq kerek olsa - turıñız. Çoq adam olğan yerge barmağa kerek olmasa - barmañız. Karantin o qadar yaramay şey degil".
Maqalede ilhaq etilgen yarımadada qullanılğan ıstılaat işletil
