Ukrainanıñ vaqtınca işğal etilgen topraqlarınıñ reintegratsiya meseleleri nazirligi 2014 senesinden başlap 100-den çoq qırımtatarı Rusiye quvetçileri tarafından «qanunsız tutuldı» ve alâ daa apiste yata, dep bildire.
«2014 senesinden başlap 100-den çoq qırımtatarı Rusiye işğalcileri tarafından tutuldı ve alâ daa apiste yata, tamır halqnıñ 25 000-den çoq vekili Qırımdaki evini terk etmege mecbur oldı», – dep bildire Ukraina nazirligi mayısnıñ 18-nde qırımtatar halqı genotsidiniñ qurbanlarını añma kününde.
Müessise malümatına köre, Ukrainanıñ vaqtınca işğal etilgen topraqlarınıñ reintegratsiya meseleleri nazirligi Qırımtatar Milliy Meclisi ve Ukraina prezidentiniñ Qırım Muhtar Cumhuriyetindeki temsilciliginen beraber bütün telekanallarnı ekranlarda belli timsallernen logo qoymağa ve saat 12:00-da qırımtatar halqı genotsidiniñ qurbanlarını hatıra daqqasınen añmağa çağırdı.
Ukraina Yuqarı Radasınıñ İnsan aqları vekâletlisi Lüdmila Denisovanıñ mayısnıñ 18-nde bildirgenine köre, Rusiye Qırımnı işğal etken soñ 93 qırımtatarını siyasiy sebeplerden taqip ete.
Rusiye bu malümatnı izaatlamay. Rusiye Tış işler naziri Sergey Lavrov işğal altındaki Qırımda insan aqlarınıñ bozuluvı aqqında laflar uydurıla, dep aytqan edi. Rusiyeniñ insan aqları vekâletlisi Tatyana Moskalkova Qırımda «milletlerara ve dinlerara añlaşuv» bar ve tamır halqqa yardım etile, dep bildirgen edi.
Salı künü, mayısnıñ 18-nde, sovetler qırımtatarlarnı Qırımdan sürgün etip başlağanına 77 yıl tola. Ukraina ve dünyada qırımtatar halqı genotsidiniñ qurbanları añıla.
Kanadanıñ New Brunswic vilâyetiniñ paytahtı Fredericton qırımtatar bayrağını köterdi.
Qırımtatar Milliy Meclisi mayısnıñ 18-nde eglenceli tedbir keçirmemege çağırdı. «Qırımtatar resurs merkezi» ise «Genotsid olmasın!» adlı informatsion kampaniyanı başlattı.
Ukraina prezidentiniñ Qırım Muhtar Cumhuriyeti ve Aqyar temsilciligi ocalarnı ve gençlik merkezleriniñ ocalarını mayısnıñ 18-nde Qırımtatar halqı genotsidiniñ qurbanları hatırasına ders keçirmelerine çağırdı.
Qırımtatar halqı genotsidiniñ qurbanlarını añma künü
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
