Saatnıñ esas haberi

Volodımır Zelenskıy: «Qırım bir vaqıt rus toprağı olmaycaq»

Volodımır Zelenskıy
Volodımır Zelenskıy

Ukraina prezidenti Volodımır Zelenskıy «Dom» telekanalına bergen interyüsında Qırımnı işğalden qurtaruv «tek vaqıt meselesi» ola, dep bildirdi.

«Qırım bir vaqıt rus toprağı olmaycaq. (Qırımtatarlarınıñ – QA) Tatarlarnıñ aqlını silip, «mında yoq ediñiz», «sürgünlik uydurıldı», dep aytmaq mümkün degil. Bu imkânsız. Tarihnı yañıdan yazsañız da, şeerlerniñ adlarını deñiştirseñiz. Episi evlerine qaytacaq. Bu tek vaqıt meselesi», – dedi Zelenskıy.

Daa evel Ukraina akimiyeti «Qırım platforması» Qırımnı işğalden qurtaruv halqara meydançığını qurmağa teşebbüs kösterdi.

Mayısnıñ 20-nde Ukraina prezidenti Volodımır Zelenskıy «Qırım platforması» sammitine 30 memleketniñ vekilleri kelecek, dep ayttı. Onıñ bildirgenine köre, Rusiye «Qırım platformasını» pek ağır yanaşa.

Avgustnıñ 2-nde Ukraina prezidenti Volodımır Zelenskıy «Qırım platformasını» keçirüvniñ maqsadı Rusiye işğal etken Qırımnı Ukraina terkibine qaytaruv ola, dep bildirdi.

Avgustnıñ 2-nde Ukraina Tış işler naziri Dmıtro Kuleba avgustnıñ 23-nde «Qırım platforması» çerçivesinde dört mevzulı panel keçirmege planlaştırıla, dep bildire.

Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.

Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

​
XS
SM
MD
LG