Link açıqlığı

Saatnıñ esas haberi

«Suv, elektrik, ticaret qamaçavı»: Rusiye Qırım platformasında iştirak etüv şartlarını aydınlattı


Mariya Zaharova
Mariya Zaharova

Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.

Bu aqta o, «Krımskiy jurnal» neşirine bergen intervyüsında ayttı.

«Bu meydançıqta Qırımnıñ suv teminlevi ve elektrik energiyasınıñ berilüvi, Kyiv tarafından yarımadanıñ ticaret ve naqliyat qamaçavınıñ lâğu etilmesi muzakere etilse, biz böyle işbirligine qarşı degilmiz», – dedi Zaharova.

Onıñ aytqanına köre, böyle meydançıqnıñ quruluv ğayesi Kyivde daa 2015 senesi muzakere etildi, şimdi ise Ukraina prezidenti Volodımır Zelenskıy «onı kerçek münderice ile toldurmağa tırışa». Zaharova, Rusiyede «bunıñ neticesine» baqmağa isteyler, dep qayd etti.

Rusiye Tış işler nazirliginiñ spikeri Moskvanıñ Qırım platformasında iştirak etmesine mania olacaq şartlar aqqında ayttı.

«Kyiv öz «platformasında» «işğalden qurtaruv» nağmesini çalacaq olsa, bizge bu format meraqlı degil. Qırımnıñ kimge ait olğanını qırımlılar 2014 senesi kösterdi. Yarımada Rusiye Federatsiyasınıñ subyekti ola, ve iç bir «platforma», «format», «strategiya» bunı deñiştiremez», – dep qoştı o.

Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.

2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.

Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.

Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.

2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.

Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.

Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.

XS
SM
MD
LG