Mahsus Qırım.Aqiqat içün
Bugün Misnkte ve başqa Belorus şeerlerinde olıp kecken vaqialarnı bir anomaliya kibi, Belorus siyasiy ayatınıñ inkisafında bir sapma kibi körmege kerekmey. Menimce, anomaliya - bu bundan evel - Aleksandr Lukaşenkonıñ aman-aman üç onyıllıqnıñ devamında olğan şeylerdir. Belarusta eñ azından - Lukaşenkonıñ akimiyetke kelgeninden berli iç bir kere açıq-aydın saylavlar olmadı.
Bu ülkede saylav dep adlandırğan şeyleri, utanmazsız devlet propagandası, raqiplerniñ yoq etmesi, neticelerniñ sahleleştirmesi ve avtoritar rejiminiñ basqa alâmetlerinen deñiştirile edi. Körüne ki, bu yalıñız diktatornıñ özüniñ ve mühlisleriniñ hayallarında episi bir ağızdan qol tuta ve rey bere. Amma kerçekten bu birlikni yalan ve zorbalıq temin ete. Ve qannen bite. Ertemi, keçmi.
Birlikni yalan ve zorbalıq temin ete. Ve qannen bite. Ertemi, keçmi
Devlet propagandası, başqa fikirde olğanlarnen küreş, rey berüvniñ sahteleştirmesi - bularnıñ episi Sovet keçmişiniñ izleri qalğan ya da onıñ ğayrıdan tiklemege istegen er yerde yapıla. Rusiyeniñ Qırım ilhaqı - daa yaqında serbest saylavlar keçirilgen ve çeşit-türlü siyasiy küçler küreşken bölgede "bahtlı" birlik tiklenilgenniñ pek güzel körgezmesidir. Bu "bahtlı" resimge kelişmegenler ise türmelerge tüşe ya da ayatnıñ kenarında qala. Eminim ki, Lukaşenkonıñ Belarustaki rejimi tamam öyle pekitildi - referendumlar, başqa fikirde olğanlarnen küreş, televizion efirlerinde yalan, qardaşlıq aqqında laflarnıñ rusiye paralarına deñiştirüvi. Sadece Qırım ilhaq etildi, Belarus ise yoq, amma bundan bir şey denişmey. Postsovet avtoritarizmi - bu er vaqıt sahteleştirme ve yalan, er vaqıt muzakereni prokuraturanen deñiştirmek ıntıluvıdır.
Avtoritar akimiyetniñ basqısı yıl-yıldan sadece kerginleşe ve şu yaşamaq zorunda olğanları sert müitniñ körmemezligini kimse arytıq urıp olamay. Belarusta bugün olğan şeyler, belki de, yarın Rusiyede olur. Qırımlılarğa ise, serbest avanen iç nefes almağan rus ve beloruslarğa oşamayıp, daa yaqınlarda nefes alğanlarını hatırlamağa daa qolay olur.
Vitaliy Portnikov, kyivli jurnalist, Qırım.Aqiqat müellifi
