Mahsus Qırım.Aqiqat içün
Ukraina Tış İşler Nazirligi, işğal altındaki Qırımdaki arbiy deñiz paradınen bağlı Rusiyeniñ Ukrainadaki elçiligine itiraz notasını yolladı. Bu parad, TİN-nde qayd etkenleri kibi, "Rusiye tarafından halqara uquq normalarınıñ, o cümleden BMT-niñ Baş Assambleyasınıñ bir çoq qararlarınıñ ve Ukraina qanunlarınıñ daa bir bozmasıdır".
Böyle notalarğa endi alışmaq da mümkün, Ukraina TİN Moskovanıñ işğal etilgen topraqlarda qanun bozmalarına er vaqıt bir cevap bere. Bu notadan evel bile, Rusiye prezidenti Vladimir Putinniñ Qırımnıñ nevbetteki ziyaretinen bağlı başqası bar edi.
Bu sadece halqara uquq normalarına ürmetsizlik degil
Amma şimdi, bu sadece işğal olmağanını körmemek qıyındır. Bu, eminim ki, ayrı tsinizm ile yapılğan işğal. Bu sadece halqara uquq normalarına ürmetsizlik degil. Bu, bellesem, işğal etilgen topraqlarnıñ sakinlerine de ürmetsizliktir, olarnıñ işlerini, telükesizligini, sağ qalmalarını köz ögüne almamaq inatlığıdır.
2014-ünci seneden berli Rusiye Qırımdaki areketlerini yarımada sakinleriniñ qayğıruvınen añlata, olar az qaldı "Bandera desantınıñ" qurbanları olacaq edi, amma "nezaketli adamlar" olarnıvaqtında qurtardı. Altı yıldan soñ ise "nezaketli adamlar" Qırımda, Rusiyede ve işğal etilgen topraqlarda havflı derecede olğan pandemiya vaqtında kütleviy merasimlerni keçire.
Tustler qaytır - koronavirus qalır.
Bundan da ğayrı, Rusiye Federatsiyasınıñ sakinleriniñ memeleketten çıqmaq çareleri sıñırlanğanı ve başqa devletlerniñ rusiyeliler içün sıñırlarını qapatqanı sebebinden, Rusiye bölgeleriniñ sakinleri rus kurortlarına ve Qırımğa yol aldı. Bu ise, eminim ki, işğal etilgen yarımadanı potentsial epidemiya merkezine çevire, çünki Qırım Rusiyede iç bir sıñırlarnen ayırılmay, pandemiyanıñ yarımadada tarqalmasına yol bermeycek iç bir profilaktika tedbirleri yapılmay. Tustler qaytır - koronavirus qalır.
Rusiye kuratorları işğal etilgen Donbasqa Ukrainanıñ serbest qısmınen sıñırnı qapatmağa buyurdılar. Qırımnı ise hastalıq pancasına berdiler.
Şimdi ise anda paradlarnı da keçireler.
Vitaliy Portnikov, kyivli jurnalist, Qırım.Aqiqat müellifi
