Mahsus Qırım.Aqiqat içün
Aman-aman bütün dünya ülkeleriniñ reberleri koronavirus yayılmasınıñ qarşısını almağa yönetilgen tedbirlerni muzakere ete, vatandaşlarına hitap ete, muşavereler keçire. Deyerli er kes - demokratik memleketlerniñ liderleri de, avtoritar ükümranlar da - telükeniñ ne qadar büyük olğanını añlay ve bu telükenen küreşmege azır olğanlarını numayış etmege tırışa.
Bu vaziyette Vladimir Putin Qırımğa kete. Ukrain yarımadanıñ ilhaqınıñ altıncı yıldönümini qayd etmek içün. Tarafdarlarnı mükâfatlandırmaq içün. Rusiyege "tarihiy hızmetlerini" hatırlatmaq içün.
Bu taaciplidir, amma bir çoq rusiyeliniñ Kreml propagandası uydurğan degil, amma aqiqiy telüke içinde olğanı bir şaraitte, olarnıñ ömür boyu prezidentlik yapmağa qarar alğan prezidenti, Qırım ilhaqından başqa bir şey teklif etip olamay, ğaliba. Aytılğanı kibi - qurabiye aşasınlar!
Bir çoq rusiyeliniñ Kreml propagandası uydurğan degil, amma aqiqiy telüke içinde olğanı bir şaraitte, olarnıñ ömür boyu prezidentlik yapmağa qarar alğan prezidenti, Qırım ilhaqından başqa bir şey teklif etip olamay, ğaliba
Amma başqa taraftan - olarğa daa ne teklif etip ola? Cermay fiyatları aşağı tüşti. Rusiye rublesi de artından ketti. Ülke nevbetteki bir iqtisadiy ve içtimaiy burhannıñ ögünde, amma bu sefer - pandemiyanen bir vaqıtqa tüşkeni içün - bu burhannıñ neticeleri yaqın keşmişke nisbeten daa ciddiy ola bile. Bu vaziyette, yalıñız "topraq toplaması" ve "öz limanını qaytuv"nı hatırlatmaq qala.
Ancaq bütün bu propaganda klişeleri, Rusiye sakinleri kerçek telüke ve aqiqiy faqırlıqnen qarşılaşmağance yaşhı edi. Şimdi olar ekisine de yaqın. Putin, statistikanı teşkil etmesini tüşünmek degil de, pandemiya aqibetleriniñ ögüni almaqnı, yarın koronavirus qurbanları olacaq ya da koronavirus sebebinden sadece iş coyacaq adamlarğa kerçek yardım etmesini tüşünmeli edi. Böyle alda kerçekten bayramlarğace barmay.
Amma körgenimiz kibi, o şeñlenmek istey. Qırım, Rusiye prezidenti vazifesinde bulunma müddetiniñ yañartuvı, soñra Ğalebeniñ 75 yıllığına bağışlanğan parad. Taun vaqtında bayram ne olğanını bilmege istese ediñiz, bu, eminim ki, tamam şu aqiqiy taun vaqtındaki bayramdır, onıñ iştirakçileriniñ ise sıcağını baqalar ve analizlerini alalar (ve bu mecaz degil, Putinge hımet etken jurnalistlerni koronavirus hastalığınıñ olıp-olmamasına teşkereler).
Ve bu deli bayram yalıñız Qırım işğaliniñ ahlâqsızlığını qayd ete.
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Vitaliy Portnikov, Kyivli jurnalist, Qırım.Aqiqat müellifi
