Mahsus Qırım.Aqiqat içün
Rusiye siyasetçileri ve propagandacıları Ukraina prezidenti Volodımır Zelenskıynıñ Qırım ve Aqyarnıñ işğalge qarşı tirenüv kününi ilân etmek qararına vazife alğan kibi açuvlanıp başladı. Rusiye prezidentiniñ matbuat kâtibi Dmitriy Peskov Zelenskıynıñ aytqanlarında birden cevap berip, Zelenskıynıñ qararınıñ «Qırım etrafındaki kerçek vaziyetnen alâqası yoq» dedi. İşğal etilgen yarımada akimiyetiniñ reberleri, jurnalistler, Yanukoviç rejiminiñ vekilleri de fikrini bildirdi. Amma bu tahmin etilgen bir cevap oldı.
Tahmin etilgen edi, çünki Moskva vaqıt keçtikçe Ukrainada Qırımnı unutırlar, işğalni qabul eterler, dep özüni işandırdı. Yarımada işğalinden soñ altı yıl keçkende bu cinayetni er yıl devlet seviyesinde hatırlamaq qararı Kremlni quturttı.
Vaqıt keçse, Qırım yarası qapanır ve yarımada aqqında unutırlar degen fikir yañlış ola
Amma açuvlanacaq şey barmı? Rusiye, Ukraina devletiniñ ve Ukraina vatandaşlarınıñ fikrini soramayıp, Ukrainanıñ bir qısmını ilhaq etmege aqqı bar olğanını Ukrainadan qabul etmesini istey. Ukraina ve Rusiye prezidentleri imzalağan añlaşmalar ve halqara uquqnıñ iç bir emiyeti olmağanını qabul etmesini istey. Angi devlet bu masharalıqqa razı olur?
Şunıñ içün vaqıt keçse, Qırım yarası qapanır ve yarımada aqqında unutırlar degen fikir yañlış ola. Qırım eski sovet boşluğındaki diger zıddiyetlerge oşamay, çünki ne Qırım ilhaqından evel, ne de ondan soñ Rusiye başqasınıñ toprağını açıq-açıq istemegen edi. Ebet, em Pridnestrovye, em Abhaziya ve Cenübiy Osetiya, em Donbas – açıq qalğan yaralar. Amma devası tapıla bilecek yaralar – ya da tapılacaq kibi bir hayal bar.
Ukrainanıñ qapanmağan Qırım yarasınıñ devası ise Kremlde saqlana
Ukrainanıñ qapanmağan Qırım yarasınıñ devası ise Kremlde saqlana, ğaliba, eñ baş odasında. Şunıñ içün Ukrainanıñ bu yarası qapanmay, ağıra ve qana, bu añlaşıla. Volodımır Zelenskıy imzalağan buyruğınen bu kerçekni daa bir kere qayd etti. Qırım körgen aqiqatnı. Dünya körgen aqiqatnı. Erte ya da keç Rusiye körecek aqiqatnı.
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Vitaliy Portnikov, Kyivli jurnalist, Qırım.Aqiqat müellifi