«Qırımtatar Maaliy Merkezi» qırımtatar halqı soyqırımınıñ 77-nci yıldönümine bağışlanğan «Soyqırımğa yoq!» adlı bir malümat kampaniyasını başlattı ve pervasız olmağan er kesni içtimaiy ağlardaki saifelerinde mahsus azırlanğan plakatlarnı paylaşıp, oña qoşulmağa çağırdı. Bunı mayısnıñ 12-nde merkezniñ matbuat hızmeti haber etti..
«Kampaniyanıñ maqsadı Ukraina ve dünya toplulığına insanlıqqa qarşı yapılğan deşetli cinayet, 1944 senesi bütün qırımtatar halqınıñ sürgün etilmesi aqqında hatırlatmaq. Qırımdan episi olıp 238 500 insan sürgün etildi, sürgünlikniñ birinci yılları ölgenlerniñ sayısı 110 200 insan edi, ya da sürgün etilgenlerniñ 46,2 faizi», – dep yazıla bildirmede.
Maaliy merkezinde, bu facialı vaqialarnı hatırlamaq pek müim olğanını qayd ettiler. «Hususan bugün, çünki tarih tekrarlana», Qırım işğal etilgen soñ, Rusiye «riayetkâr olmağanlarğa qarşı Şuralar Birliginiñ basqıcı siyasetini qullana».
«Rusiyeniñ Qırımnı 2014-nci yılda işğali ve soñraki basqılar, tevqifler, tintüvler, sorğular, qanusız etaplar ve öldürüvler tamır halqınıñ yañı bir kütleviy köçmesine ve asılında melez sürgünine sebep oldı», – dep qoştılar merkezde.
Plaktlar «Qırımtatar Maaliy Merkezi» ve ukrain ressamı Andriy Yermolenko ile beraber azırlanğan.
Qırımtatar Milliy Meclisi 2021 senesi mayısnıñ 18-nde Ukrainanıñ vilâyet merkezleri ve şeerleriniñ meydanlarında resmiy eglence tedbirlerini keçirmemege çağırdı.
Qırımtatar halqı genotsidiniñ qurbanlarını añma künü
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
