Ukrayina prezidentiniñ ofisi Rusiye prezidenti Vladimir Putinniñ özek silâsını qullanuv aqqında beyanatlarına cevap berdi.
«Özek şantajından ğayrı, Rusiye Federatsiyasında başqa bir şey yoq, dünyanı qorquzmaq içün başqa aletleri yoq. Bu aletler çalışmaycaq», – dep yazdı Ukraina Prezidenti ofisiniñ yolbaşçısı Andriy Yermak.
Rusiye prezidenti Vladimir Putin sentâbrniñ 25-nde Rusiye er bir özek olmağan devletniñ istilâsını, amma «özek klubından» bir devletniñ iştiraki ya da destegi ile, birleşken ücüm olaraq baqmağa planlaştıra, dep ayttı. Bundan da ğayrı, onıñ aytqanına köre, Moskva aerokosmik ücüm silâlarını kütleviy sürette çıqarmaq aqqında işançlı malümat alğan soñ, özek silâsını qullanmaq imkânını baqıp çıqacaq. Laf strategik ve taktik uçaqlar, kruiz raketa, dronlar, gipersonik ve diger uçaqlar aqqında kete.
Bu beyanat Kyivniñ Rusiye topraqlarına öz silâlarınen ücüm etmek içün ğarbiy ittifaqdaşlarından ruhset almaq isteginden soñ yapıldı.
ABD ziyareti arfesinde Ukrayina prezidenti Volodımır Zelenskıy Ukrayinağa «tolu diapazonlı imkân» kerek olğanını ayttı ve ğarp silâlarını qullanuv sıñırlavlarını lâğu etmek kerek, dep qayd etti. O, kelecek afta (onıñ ABD ziyareti aftası) Rusiye istilâsını toqtatmaqta «büyük ölçüde qararlı» bir afta ola bilecegini ayttı.
The Times gazetası sentâbrniñ 17-nde Britaniya Ukrayinağa Rusiyedeki nişanlarğa uzaq mesafeli silâ ücümleri yapmağa ruhset berüv meselesi boyunca «özü areket etmeycek», dep yazdı.
İngiltere ükümeti uzaq mesafeli raketalarnen nişanlarğa urmaq içün Amerikanıñ yolbaşçılıq sistemaları pek müim olğanını tüşüne. London, bu meselede prezident Joe Bidennen fikir farqları olsa da, ABD sentâbrniñ 10-nda açılğan BM Baş Assambleyasınıñ sessiyasında buña izin bere bile, dep bildire.
ABD Devlet departamentiniñ vekili Matthew Miller sentâbrniñ 16-nda mühbirlerniñ Rusiyedeki nişanlarğa uzaq mesafeli Amerika silâlarınen ücümler aqqında qarar qabul etilgenmi degen sualine cevap berip, Beyaz Sarayda bu meselede deñişmeler aqqında «iç bir ilânları yoq», dep cevap berdi.
Bundan evel ABD devlet kâtibi Antony Blinken ve onıñ Britaniya zenaatdaşı David Lammyniñ Kyiv ziyaretlerinden soñ «The Guardian» gazetası menbalarına esaslanıp, Büyük Britaniya Ukrayinağa Rusiyedeki nişanlarğa ücüm etmek içün Storm Shadow raketalarını qullanmağa ruhset bergenini yazdı. Lâkin ziyaret vaqtında ve ondan soñ iç bir açıq ilân olmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
