Ukrainanıñ NATO-ğa qoşulması Donbastaki vaziyetni daa da fenalaştırır, dep bildirdi Rusiye prezidentiniñ matbuat kâtibi Dmitriy Peskov.
«Bu Ukrainağa içki meselesini al etmege yardım etmez, dep tüşünemiz. Bizim fikrimizce bu vaziyetni daa da fenalaştırır, çünki NATO degende insanlarnıñ fikrini de unutmamaq kerek», – dedi Peskov.
O, Ukrainanıñ nezaretinde olmağa Donbas topraqlarındaki bir qaç million insan içün bu qabul etilmez, dep saya.
NATO Baş kâtibi Yens Stoltenberg Ukraina prezidenti Volodımır Zelenskıy ile laf etken ve Şimalatlantik bağlaşımnıñ Ukraina topraq bütünligi ve suverenitetine destegini bildirgen.
Bu afta Ukraina Silâlı Quvetleri Baş ştabınıñ yolbaşçısı Ruslan Homçak bildirdi ki, martnıñ başında Novorossiysk ve Stavropolden işğal etilgen Qırımğa talimler içün avuştırılğan Rusiye ordusı yarımadada qalmağa devam ete.
Rusiye prezidenti Vladimir Putinniñ matbuat kâtibi Dmitriy Peskov bildirgenine köre, «Rusiyeniñ memleket topraqlarında istegeni kibi ordu avuştırmağa aqqı bar».
Beyaz ev ABD prezidenti Joseph Biden ve Ukraina devlet başı Volodımır Zelenskıy telefondan laf etkenlerini resmiy tasdıqladı ve Amerika devlet başı «Rusiyeniñ Qırım ve Donbastaki devam etken tecavuzı qarşısında Ukrainağa» destegini tasdıqlağanını bildirdi.
