NATO Baş kâtibi Yens Stoltenberg Ukraina prezidenti Volodımır Zelenskıy ile laf etken ve Şimalatlantik bağlaşımnıñ Ukraina topraq bütünligi ve suverenitetine destegini bildirgen, dep haber ete Azatlıq Radiosı.
«Ukrainadaki ve etrafındaki Rusiyeniñ arbiy faaliyeti ve ateşni toqtatuv rejiminiñ bozuvı ile bağlı ciddiy raatsızlığımnı bildirmek içün prezident Zelenskıyge telefon ettim. NATO Ukraina suvereniteti ve topraq bütünligini qatiyen destekley. Yaqın işbirligimizni desteklemege devam etemiz», – dep yazdı tviterde Stoltenberg.
Ukraina prezidentiniñ ofisinde bildirgenlerine köre, Zelenskıy Yens Stoltenbergni «Rusiye Ukraina sıñırları yanında ordusını toplağanı aqqında haberdar etken».
«Soñki aftaları rus işğalcileri tarafından ateşni toqtatuv rejimi bozulğanını ve ölgen Ukraina imayecileriniñ sayısını köremiz», – matbuat hızmeti Zelenskıynıñ aytqanlarında alıntı ketire.
Prezident Alyans başına minnetdarlıq bildirdi ve NATO-nıñ aza devletlerini Qara deñiz telükesiziligi meselesine ziyade diqqat ayırmağa ve öz arbiy bulunuvını arttırmağa çağırdı.
Bu afta Ukraina Silâlı Quvetleri Baş ştabınıñ yolbaşçısı Ruslan Homçak bildirdi ki, martnıñ başında Novorossiysk ve Stavropolden işğal etilgen Qırımğa talimler içün avuştırılğan Rusiye ordusı yarımadada qalmağa devam ete.
Rusiye prezidenti Vladimir Putinniñ matbuat kâtibi Dmitriy Peskov bildirgenine köre, «Rusiyeniñ memleket topraqlarında istegeni kibi ordu avuştırmağa aqqı bar».
Beyaz ev ABD prezidenti Joseph Biden ve Ukraina devlet başı Volodımır Zelenskıy telefondan laf etkenlerini resmiy tasdıqladı ve Amerika devlet başı «Rusiyeniñ Qırım ve Donbastaki devam etken tecavuzı qarşısında Ukrainağa» destegini tasdıqlağanını bildirdi.
