Beyaz ev ABD prezidenti Joseph Biden ve Ukraina devlet başı Volodımır Zelenskıy telefondan laf etkenlerini resmiy tasdıqladı ve Amerika devlet başı «Rusiyeniñ Qırım ve Donbastaki devam etken tecavuzı qarşısında Ukrainağa» destegini tasdıqlağanını bildirdi.
«Prezident Zelenskıynıñ qabarcılıqqa qarşı küreşüv ve Ukraina halqı içün adaletni ve telükesizlikni temin etken ortaq demokratik degerliklerimizge esaslanğan bir islâat programmasını amelge keçirüv planını desteklemek içün memuriyetiniñ strategik işbirlikni canlandırmaq tarafdarlığını bildirdi», – dep yazıla bildirmede.
Liderler bu islâatlarnıñ Ukrainanıñ Avropaatlantik istekleri içün «esas olğanı» ile razı oldılar. COVID-19 pandemiyasına tarqalmağa yol bermemek ve bölgede demokratiyanı pekitmek içün ABD ve Ukraina arasında sıq işbirlikniñ müimligini de muzakere ettiler.
ABD prezidenti Joseph Biden ve Ukraina devlet başı Volodımır Zelenskıy telefondan laf ettiler. Bu laqırdı 30-40 daqqa devam etti, esas mevzu Donbasta Rusiye ordusınıñ toplanuvı oldı. Ukraina prezidenti Volodımır Zelenskıy öz Twitter saifesinde, Amerika devlet başı ile «laf etmege memnün olğanını» ve Amerikanıñ destegine büyük qıymet bergenini haber etti.
«Demokratiyamıznıñ qoruvı aqqında söz ketkende, omuz omuzğa berip ketemiz. Ukrainanınıñ şeklini deñiştirmek, şeffaflıqnı eyilleştirmek ve barışıqqa irişmek istegim o qadar küçlü ki. Amerika ortaqlığı Ukraina içün pek müimdir», – dep yazdı o.
ABD Mudafaa naziri Lloyd Ostin, Rusiye tecavuzı kerginleşken taqdirde Birleşken Devletler Ukrainağa qoltutmağa azır olğanı bildirdi.
Ukraina Tış işler naziri Dmıtro Kuleba, «Rusiyeniñ vaziyetni kerginleştirüvi soñki yıllarda eñ büyük ola», dep bildirdi. Onıñ qayd etkenine köre, «Rusiye Federatsiyası ateşsiz rejimge sadıq olğanını isbatlamağa istemeyip», Donetsk ve Lugansk vilâyetlerinde ve Qırımda vaziyetni muntazam sürette kerginleştire.
Budan ğayrı o, OSCE baş kâtibi Helga Schmid telefonda laf etip, «Rusiye, Donetsk ve Lugansk vilâyetlerinde ve Qırımda telükesizlik vaziyetini muntazam sürette kerginleştire», dep haber etti.
Bu afta Ukraina Silâlı Quvetleri Baş ştabınıñ yolbaşçısı Ruslan Homçak bildirdi ki, martnıñ başında Novorossiysk ve Stavropolden işğal etilgen Qırımğa talimler içün avuştırılğan Rusiye ordusı yarımadada qalmağa devam ete.
Onıñ qayd etkenine köre, Rusiye Ukraina sıñırına ordusını çeke.
Ukraina Silâlı quvetleri Arbiy deñiz küçleriniñ komandanı Oleksiy Neijpapa, yedi yıl devam etken Qırım işğali vaqtında Rusiye Qara deñiz flotunıñ gemi ve suvastı gemi erkânı 45% arttı, dep bildirdi.
Mart ayında yarımadada Rusiye arbiyleriniñ muntazam talimleri keçirildi. Rusiye Mudafaa nazirligi martnıñ 16-nda Qırımda Opuk poligonında başlağan Ava desant ordularınıñ taqım ştab talimleri aqqında bildirgen edi.
2014 senesinde Qırım ilhaq etilgen soñ Rusiye yarımadada muntazam surette arbiy talimlerni yaptıra. Ukrainanıñ Baş ştabında, Rusiyeniñ Qırımdaki areketlerine qanunsız deyler.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
