Ukraina Tış işler naziri Dmıtro Kuleba, «Rusiyeniñ vaziyetni kerginleştirüvi soñki yıllarda eñ büyük ola», dep bildirdi. Onıñ qayd etkenine köre, «Rusiye Federatsiyası ateşsiz rejimge sadıq olğanını isbatlamağa istemeyip», Donetsk ve Lugansk vilâyetlerinde ve Qırımda vaziyetni muntazam sürette kerginleştire.
Bu aqta Ukraina Tış işler nazirligi matbuat hızmetiniñ saytında derc etilgen beyanatta aytıla.
«Rusiye Federatsiyası yapqan areketlerinen vaziyetni çıqmaz yolğa ketirdi, tek bir çare qaldı: diplomatiya. Moskva arbiy kerginleştirüvni toqtatmalı, siyasiy-diplomatik usullarğa ve ateşsiz rejimge sadıq olğanını acele ve şartsız isbatlamalı», – dep qayd etti o.
Kulebanıñ aytqanına köre, Ukraina Normand formatındaki aracılar olaraq Almaniya ve Frenkistannen beraber «Rusiyeni konstruktiv muzakere esnasına aveslendirmek içün elinden kelgenini yapalar».
«Başqa ortaqlarımız, hususan ABD, Canada, Büyük Britaniya, NATO, Rusiyeniñ muzakerelerni uzatmasına qol tuta. Rusiye yañlış malümat tarqatsa da, şunı aytayım: Ukraina siyasiy-diplomatik usullarğa emiyet berecek, çünki barışıq ve insanlarnıñ ayatı devletimizniñ temel qıymeti ola», – dep ayttı Dmıtro Kuleba.
Hatırlatamız, Ukraina Tış işler naziri Dmıtro Kuleba OSCE baş kâtibi Helga Schmid telefonda laf etip, «Rusiye, Donetsk ve Lugansk vilâyetlerinde ve Qırımda telükesizlik vaziyetini muntazam sürette kerginleştire», dep haber etti.
Rusiye prezidenti Vladimir Putinniñ matbuat kâtibi Dmitriy Peskov, Rusiye ordusınıñ Ukraina sıñırlarına ve işğal etilgen Qırımğa çekilgenini izaatlap, «Rusiyeniñ memleket topraqlarında istegeni kibi ordu avuştırmağa aqqı bar», dep ayttı.
Bu afta Ukraina Silâlı Quvetleri Baş ştabınıñ yolbaşçısı Ruslan Homçak bildirdi ki, martnıñ başında Novorossiysk ve Stavropolden işğal etilgen Qırımğa talimler içün avuştırılğan Rusiye ordusı yarımadada qalmağa devam ete.
Onıñ qayd etkenine köre, Rusiye Ukraina sıñırına ordusını çeke.
Ukraina Silâlı quvetleri Arbiy deñiz küçleriniñ komandanı Oleksiy Neijpapa, yedi yıl devam etken Qırım işğali vaqtında Rusiye Qara deñiz flotunıñ gemi ve suvastı gemi erkânı 45% arttı, dep bildirdi.
Mart ayında yarımadada Rusiye arbiyleriniñ muntazam talimleri keçirildi. Rusiye Mudafaa nazirligi martnıñ 16-nda Qırımda Opuk poligonında başlağan Ava desant ordularınıñ taqım ştab talimleri aqqında bildirgen edi.
2014 senesinde Qırım ilhaq etilgen soñ Rusiye yarımadada muntazam surette arbiy talimlerni yaptıra. Ukrainanıñ Baş ştabında, Rusiyeniñ Qırımdaki areketlerine qanunsız deyler.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
