Ukraina Tış işler naziri Dmıtro Kuleba OSCE baş kâtibi Helga Schmid telefonda laf etip, «Rusiye, Donetsk ve Lugansk vilâyetlerinde ve Qırımda telükesizlik vaziyetini muntazam sürette kerginleştire», dep haber etti. Bu aqta Ukraina Tış işler nazirliginiñ saytında derc etilgen beyanatta aytıla.
Qayd etilgenine köre, «Rusiye Federatsiyası ateşsiz rejimine sadıq qalğanını isbatlamağa istemegen soñ» vaziyet kerginleşe.
Kuleba, OSCE Ukraina Mahsus monitoring missiyasınıñ mandatını uzatmaq ve bücetini qabul etmek qararını alğışladı.
«Mahsus monitoring missiyasınıñ mandatını uzatuv Rusiye yapqan kergin telükesizlik vaziyetinde pek müim. Er şeyni körip eşitken OSCE monitorları şimdi Donetsk ve Lugansk vilâyetinde pek kerek», – dep bildire Kulebanıñ aytqanlarını Ukraina Tış işler nazirliginiñ matbuat hızmeti.
Nazir, Rusiyeniñ ordusını Ukrainağa yaqın yerlerde arttırğanını aytıp, kontrol etilmegen Rusiye-Ukraina devlet sıñırı boyunca OSCE patrul bazalarını açmaq müim ola, dep qayd etti.
«OSCE, Rusiye Federatsiyasınıñ areketlerini diqqatnen taqip etmeli», – dep hulâsa çıqardı Dmıtro Kuleba.
Rusiye prezidenti Vladimir Putinniñ matbuat kâtibi Dmitriy Peskov, Rusiye ordusınıñ Ukraina sıñırlarına ve işğal etilgen Qırımğa çekilgenini izaatlap, «Rusiyeniñ memleket topraqlarında istegeni kibi ordu avuştırmağa aqqı bar», dep ayttı.
Bu afta Ukraina Silâlı Quvetleri Baş ştabınıñ yolbaşçısı Ruslan Homçak bildirdi ki, martnıñ başında Novorossiysk ve Stavropolden işğal etilgen Qırımğa talimler içün avuştırılğan Rusiye ordusı yarımadada qalmağa devam ete.
Onıñ qayd etkenine köre, Rusiye Ukraina sıñırına ordusını çeke.
Ukraina Silâlı quvetleri Arbiy deñiz küçleriniñ komandanı Oleksiy Neijpapa, yedi yıl devam etken Qırım işğali vaqtında Rusiye Qara deñiz flotunıñ gemi ve suvastı gemi erkânı 45% arttı, dep bildirdi.
Mart ayında yarımadada Rusiye arbiyleriniñ muntazam talimleri keçirildi. Rusiye Mudafaa nazirligi martnıñ 16-nda Qırımda Opuk poligonında başlağan Ava desant ordularınıñ taqım ştab talimleri aqqında bildirgen edi.
2014 senesinde Qırım ilhaq etilgen soñ Rusiye yarımadada muntazam surette arbiy talimlerni yaptıra. Ukrainanıñ Baş ştabında, Rusiyeniñ Qırımdaki areketlerine qanunsız deyler.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
