Ukraina prezidenti saylavlarında iştirak 63%-dan çoq oldı, dep bildire Ukraina Merkeziy Saylav Komitetiniñ saytı. Bu - 199 okrugdan 198-iniñ esabatına köre.
Eñ yüksek insan kelüv raqamı İlbav (Lvov) ve Volın vilâyetlerinde (68,88% ve 68,33%), eñ alçaq - Zakarpattâ vilâyetinde (46,99%), dep bildire Radio Svoboda.
2014 senesi keçirilgen prezident saylavında adam kelüvi 59%-nı teşkil etti.
MSK malümatına köre, 199-dan 10 saylav okrugınıñ esabatına esaslanaraq, adam kelüvi 66,8 %-nı teşkil etti.
Martnıñ 31-inde Ukrainada prezident saylavları keçti. Bu yer içün 39 namzet küreşti. Saylav bölükleri öz işini saat 8:00-da başladı ve 20:00-ğace çalıştı. Merkeziy saylav komissiya, saylav neticelerini aprelniñ 10-unace ilân etmek kerek. Saylavnıñ birinci basamağında ğalebe qazanmaq içün bir de bir namzet 50%-dan reyni almaq kerek. Öyle birisi olmasa, saylavnıñ ekinci basamağı aprelniñ 21-inde keçirilecek. Qırımlılar qıta Ukrainada rey bere bile.
Milliy ekzit-pollarnıñ bildirgenine köre, eñ çoq rey Volodımır Zelenskıy alğan- 30,4 %, şimdiki prezident Petro Poroşenko ekinci yerde ve 17,8% reylerni alğan.
