Ukrainada nam qazanğan halq artisti ve alıpbarıcı Natalya Sumska Qırımdak tevqif etilgen ve psihiatrik ekspertiza içün hastahanege yatqızılğan qırımtatar siyasetçisi ve faali Nariman Celâlğa destek bildirdi.
Bunı o Qırım.Aqiqatqa bergen eksklüziv intervyü vaqtında bildirdi.
"Şimdi Meclis reisiniñ muavini Celâl pek ağır vaziyette. Oña destegimizni bildiremiz. Sizni unutmaymız ve iç bir vaqıt unutmağan edik. Er vaqıt yanıñızğa turmağa azırmız", - dedi o.
Sumska Celâlnıñ Aqmescit SİZO-sına avuştırılmasını da tefsir etti.
"Sağ adam, insaflı adam, başında aqlı olğan adam, namuslı adam ve onı yaramay birisi kibi köstermek doğru degil. Narimannıñ alı şimdi nasıl olğanını tasavur etem. Oña destek kerek. Qorantası, dostları qoltutqanını bile ve biz de onıñ yanında. Nariman Celâl buña mıtlaqa inansın", - dedi o.
Bundan ğayrı, o, Qırım sakinlerine muracaat etip, Ukrainanını unutmamağa çağırdı.
"Bugünki vaziyetke biraz başqa türlü baqqanlar meni eşitse, bir şey atmağa isteyim, belki de öz mirasıñızdan nafile red etesiz. Sizni qoruğan, baqqan, aşatqan memleketke inanıp, teşekkür etmek kerek. Bu Ukrainadır. Ve onı unutmamalısız", - dedi Sumska.
2018 senesi Rusiye apsinden azat etilgen ukrainalı deñizciler Vladislav Kostişin ve Bogdan Golovaş Qırımda apiske alınğan qırımtatar faali ve siyasetçisi Nariman Celâlğa sebat ve metanet tiledi.
Nikolay Polozov oktâbrniñ 8-nde Nariman Celâl psihiatrik ekspertizağa yollanğannı haber etti.
Daa evel advokat, tevqif etilgen qırımtatar faali Nariman Celâlnıñ mektüpler almağanını bildir
Bundan evel berilgen malümatqa köre, faalniñ qabaatlavı sertleştirildi, şimdi 20 yılğa qadar azatlıqtan marum etile bile. FSB, Nariman qabaatlanğan diversiya yapıluvına yardım etüvni diversiyada iştirak etüvge deñiştirip, qabaatlavnı sertleştirgen edi.
ABD OSCE missiyası Nariman Celâlnı ve üç doğmuş qardaş Ahtemovlarnı acele azat etmesine çağırğan edi.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
