Ukraina ve ABD OSCE eyyetleri OSCE Viyana daimiy şurasınıñ toplaşuvında Rusiye mahkemesiniñ Aqmescitteki «Hizb ut-Tahrir davasınıñ» beş mabüsine qarşı çıqarğan ükmüni takbih ettiler, dep haber ete «Ukrinform» ukraina haber agentligi.
«İyünniñ 18-nde Rostov-na-Donudaki Rusiye mahkemesi Ukrainada legal olğan, amma Rusiye işğalci akimiyeti tarafından yasaqlanğan «Hizb ut-Tahrir» teşkilâtına alâqası olğanında qabaatlanğan beş qırımtatarını 12 yıldan 17 yılğa qadar apis cezalarına üküm etti. Ukraina qırımtatar halqına qarşı siyasiy repressiyalarnı gizlemek içün terrorizmge qarşı qanun qullanıluvı olğan bu qararğa narazılıq bildire», – dep bildirdi Ukrainanıñ halqara teşkilâtlardaki Viyana daimiy vekili İgor Prokopçuk.
Diplomatnıñ qayd etkenine köre, işğal altındaki yarımadada zulum ve taqipler tez vaqıtta toqtamalı ve Rusiye «qanunsız tutulğan ukrain ve qırımtatarlarnı azat etmeli».
Bu mevzuda ABD OSCE missiyasınıñ yolbaşçı muavini vazifelerini eda etken Gregori Makris de fikrini ayttı. O, «Qırımda etnik ukrain ve qırımtatarlar Rusiye işğalci akimiyeti tarafından taqip etile, tutula ve apiske alına», dep qayd etti.
«İyünniñ 18-nde Rusiye mahkemesi beş qırımtatarını «Hizb ut-Tahrir» islâm teşkilâtına alâqası olğanından12-17 yıl apiste qalmasına üküm etkeninden qasevetlenemiz. Bu teşkilât Ukrainada qanuniy ola, Qırım da onıñ bir parçası. Bizler Rusiyeni Qırımdaki taqiplerni toqtatmasına ve qanunsız tutulğan er kesni azat etmesine, em de Ukrainağa Qırım üzerindeki kontrolni qaytarmasına çağıramız», – dedi o.
Rostov-na-Donudaki Şimaliy-Kavkaz okrugı arbiy mahkemesi Teymur Abdullayevni 17 yıl, Uzeir Abdullayevni 13 yıl, Rustem İsmailovnı 14 yıl, Ayder Saledinov ve Emil Cemadenovnı 12 yıl apishanede qalmasına üküm etti.
Rustem İsmailov, Uzeir Abdullayev ve Emil Cemadenovğa mahkeme qabaatlav tarafı istegeninden bir yıl çoq berdi. Qırımlılarnıñ imayesi mezkür qararnı şikâyet etecek ola.
Ukraina Tış işler nazirligi, Rusiye Şimaliy-Kavkaz okrugınıñ arbiy mahkemesiniñ Aqmescitteki birinci «Hizb ut-Tahrir davasınıñ» mabüslerine qarşı çıqarğan üküm sebebinden narazılıq bildirip, dünya toplulığını Rusiyege qarşı sanktsiyalarnı quvetleştirmesine çağırdı.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov veAyder Saledinov tevqif etilgen edi
Keçken sene dekabrniñ 6-nda belli oldı ki, Aqmescitteki birinci «Hizb ut-Tahrir davasınıñ» mabüsleri Rostov-na-Donu SİZOsına etap etildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
