Link açıqlığı

Saatnıñ esas haberi

Aqmescitteki «Hizb ut-Tahrir davası» mabüsleriniñ imayesi Rusiye mahkemesiniñ ükmüni şikâyet etecek ola


Advokat Lilâ Gemeci
Advokat Lilâ Gemeci

Aqmescitteki birinci «Hizb ut-Tahrir davası» mabüsleriniñ imayesi Şimaliy-Kavkaz okrugı arbiy mahkemesiniñ ükmüni tahmin etken edi ve onı şikâyet etecek ola. Bu aqta advokat Lilâ Gemeci Qırım.Aqiqat mühbirine bildirdi.

«Em imayeci, em de mabüsler içün beklenilgen apis müddetleri. Bu davalar boyunca üküm mahkeme tahqiqatı başlamazdan çoq daa evel çıqarılğan edi, dep aytqan edik, neticesi endi yazılğan edi. Rostovda keçirilgen oturışuvlar adaletli mahkeme esnasınıñ bir taqlitidir», – dedi advokat.

Gemeciniñ qayd etkenine köre, dava mabüslerini mahkemeniñ üçüne – Rustem İsmailov, Uzeir Abdullayev ve Emil Cemadenovğa – nisbeten cezanı sertleştirmek (qabaatlav tarafınıñ istegine baqqanda) qararı şaşırmadı, amma «soñuna qadar mahkemelerniñ cesareti ve adaletine işanğan ediler».

Advokatnıñ aytqanına köre, imaye ükümnen bağlı temyiz arizasını berecek.

«Bu apis cezası tek kâğıtta bar. Asılında çekecek cezaları qadı ya da prokurorlarnen bağlı degil. Repressiyalarnı tek siyasiy iradenen toqtatmaq mümkün. Amma, ne yazıq ki, ya akimiyet bunı yapmağa istemey, ya da bu belli bir millet ya da dinge qarşı genotsid siyaseti ola. Qırımda bu eki alâmet bir ola», – dep ayttı Gemeci.

Rostov-na-Donudaki Şimaliy-Kavkaz okrugı arbiy mahkemesi Teymur Abdullayevni 17 yıl, Uzeir Abdullayevni 13 yıl, Rustem İsmailovnı 14 yıl, Ayder Saledinov ve Emil Cemadenovnı 12 yıl apishanede qalmasına üküm etti.

Rustem İsmailov, Uzeir Abdullayev ve Emil Cemadenovğa mahkeme qabaatlav tarafı istegeninden bir yıl çoq berdi.

2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov veAyder Saledinov tevqif etilgen edi​

Keçken sene dekabrniñ 6-nda belli oldı ki, Aqmescitteki birinci «Hizb ut-Tahrir davasınıñ» mabüsleri Rostov-na-Donu SİZOsına etap etildi.​

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

XS
SM
MD
LG