Ukraina Tış işler nazirligi, Rusiye Şimaliy-Kavkaz okrugınıñ arbiy mahkemesiniñ beş qırımlı – Aqmescitteki birinci «Hizb ut-Tahrir davasınıñ» mabüslerine qarşı çıqarılğan üküm sebebinden narazılıq bildirdi. Nazirlik, dünya toplulığını Rusiyege qarşı sanktsiyalarnı quvetleştirmesine çağırdı.
Bu aqta Ukraina Tış işler nazirliginiñ iyünniñ 18-nde aydınlatqan beyanatında aytıla.
«Dünya toplulığını bu qanunsız qararlarnı takbih etmesine ve Rusiyeni vaqtınca işğal etilgen Qırımda insan aqlarınıñ bozuluvını toqtatmağa, Rusiyede qanunsız tutulğan Ukraina vatandaşlarını azat etmesine mecbur etmek ve Ukraina topraq bütünliginiñ halqara seviyede tanılğan sıñırlarda ğayrıdan tiklenmesi maqsadınen istilâcı devletke qarşı siyasiy-diplomatik ve sanktsiyalarnı quvetleştirmesine çağıramız», – dep aytıla beyanatta.
Müessise qırımlılarğa qarşı mahkeme esnasını «sahte», ükümni ise «qanunsız» dep adlandırdı.
«Rusiye mahkeme sistemasınıñ bağlı olğanınıñ bir delili, em de qırımtatar halqınıñ vekillerine qarşı siyasiy repressiyalarnı gizlemek içün terrorizmge qarşı qanunlarnıñ Rusiye işğalci memuriyetiniñ qullanuv misalidir», – dep bildirdi Tış işler nazirligi.
Rostov-na-Donudaki Şimaliy-Kavkaz okrugı arbiy mahkemesi Teymur Abdullayevni 17 yıl, Uzeir Abdullayevni 13 yıl, Rustem İsmailovnı 14 yıl, Ayder Saledinov ve Emil Cemadenovnı 12 yıl apishanede qalmasına üküm etti.
Rustem İsmailov, Uzeir Abdullayev ve Emil Cemadenovğa mahkeme qabaatlav tarafı istegeninden bir yıl çoq berdi.
Qırımlılarnıñ imayesi ükümni şikâyet etecek ola.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov veAyder Saledinov tevqif etilgen edi
Keçken sene dekabrniñ 6-nda belli oldı ki, Aqmescitteki birinci «Hizb ut-Tahrir davasınıñ» mabüsleri Rostov-na-Donu SİZOsına etap etildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
