Ukraina Tış işler naziriniñ birinci muavini Emine Cepparnıñ fikirince, Rusiyege qarşı siyasiy basqı daa küçlü, iqtisadiy sanktsiyalar ise daa sert olmalı. Bu aqta o, Anadolu Ajansı türk neşirine ayttı.
«Sanktsiyalar keregi kibi quvetleştirilmese, Qırım meselesinde Rusiye areketlerini deñiştirmeycek, dep tüşünemiz», – dep bildire Cepparnıñ sözlerini Tış işler nazirligi.
Onıñ aytqanına köre, Ukraina nazirligi Qırım meselesiniñ halqara alanda daa faal çezilmesini istey, «Rusiyege qarşı siyasiy basqı daa küçlü, iqtisadiy sanktsiyalar ise daa sert olmalı», dep qoştı.
Ukraina, «Rusiyeni yapqan cinayetleri ve bozuvları içün mesüliyetke çekmege» yardım etken halqara mahkemelernen çalışa degen Ceppar «Ukraina, Rusiyeniñ Qırımda ve Donbasta yapqan qanunsız areketleri içün bu memleketke qarşı halqara mahkemelerde baqılacaq qabaatlavlarnı quvetleştirmege niyetlene», dep qayd etti.
Rusiye Tış işler nazirligi Cepparnıñ beyanatına daa cevap bermedi.
Ukraina baş naziri Denıs Şmığalniñ bildirgenine köre, Ukraina Tış işler nazirligi Qırım içün mahsus halqara format – «Qırım – Ukrainadır» halqara platformasınıñ – quruluvı «kontseptsiyasını finalleştirdi».
Ukraina Tış işler naziri Dmıtro Kuleba bildirdi ki, Rusiyeni Qırımnı işğalden qurtaruv meselesinen bağlı halqara meydançıq işinde körmey.
Kuleba Qırım.Aqiqatqa bergen intervyüsında Qırımnı işğalden qurtaruv meselesi Donbasnen bağlı «Minsk añlaşmalarından» ayrı baqılmalı, dep ayttı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
