Link açıqlığı

Saatnıñ esas haberi

Qırımnı işğalden qurtaruv halqara meydançığı Rusiyesiz olacaq – Kuleba


Dmıtro Kuleba
Dmıtro Kuleba

Ukraina Tış işler naziri Dmıtro Kuleba Qırımnı işğalden qurtaruv meselesi boyunca halqara meydançıqta Rusiyeni körmey. Bu aqta o, «Segodnâ» neşirine bergen intervyüsında ayttı.

Onıñ fikirince, 2014 senesi Qırım meselesinde stabil meydançıq ve format belgilemeyip, «hata yapqanlar». Şu sebepten al-azırda Ukraina akimiyeti içün bunıñ üzerinde çalışmaq daa zor ola, dep tüşüne Küleba.

«Özümizni aldatmayıp, Rusiye bu formatqa kirmeycek, dep aytmaq kerekmiz. Üç vazifeni yapacaq platformanı qurmaq kerekmiz. Birincisi – Qırım meselesini halqara kün tertibiniñ prioritetleri arasında tutmaq. Ekincisi – daa çoq iştirakçiniñ ğayretlerini idare etmege, Qırımnı qabul etmeme siyasetini ve Rusiyege qarşı sanktsion siyasetini temin etmege imkân berecek. Üçüncisi – anda müim bir yer olmalı – işğal altındaki yarımadada insan aqlarınıñ qorçalavı», – dep qayd etti Tış işler naziri.

Kuleba Qırım.Aqiqatqa bergen intervyüsında Qırımnı işğalden qurtaruv meselesi Donbasnen bağlı «Minsk añlaşmalarından» ayrı baqılmalı, dep ayttı.

Ukraina Tış işler nazirligi Qırımnı işğalden qurtaruv strategiyasını azırlay. Şimdilik anca leyha şeklinde, qarama variantı bar, amma Milliy telükesizlik ve mudafaa şurası, ükümet ve Prezident ofisiniñ teşebbüsleri sayesinde kenişletilecektir.

Kyivdeki soñki matbuat konferentsiyasında Ukraina prezidenti Volodımır Zelenskıy Ukraina işğal etilgen topraqlarını, hususan Qırımnı kontroline qaytaruvdan vazgeçmey, dep işandırdı.

Baş nazir muavini – Ukrainanıñ vaqtınca işğal etilgen topraqlarınıñ reintegratsiya naziri Oleksiy Reznikov Qırım.Aqiqat Radiosınıñ yayınında Ukraina akimiyeti Qırımnıñ işğalden qurtarıluvınen bağlı muzakereler içün halqara meydançıqnı qurmağa istey, dep qayd etti. Amma onıñ ne vaqıt ve nasıl bir formatta olacağını tahmin etip olamay.

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG