Ukraina Tış işler naziri Dmıtro Kuleba emin ki, Qırımnı işğalden qurtaruv meselesi Donbasnen bağlı «Minsk muzakerelerinden» ayrı baqılmalı.
Bu aqta o, Qırım.Aqiqatqa bergen intervyüsında ayttı.
«Şimdi Minsk formatına Qırım meselesini de kirsetmek, kerçekten, em Qırım, em Donbasnı blok etmektir. Şimdi olğan kerçeklerge baqmalı. Em Tış işler nazirligi, em Prezident ofisinde – bütün seviyelerde – Qırım meselesiniñ kün tertibinde prioritetli qalması içün çalışamız, emin oluñız», – dedi Kuleba.
Onıñ bildirgenine köre, al-azırda Ukraina «faal Qırım meselesini halqara muzakerelerde yañıdan başlattı».
«Onı pek faal köteremiz, ortaqlarımıznen bağ quramız. Yani olarnı nevbetteki adımlarğa azırlaymız», – dep qoştı Ukraina naziri.
Fevralniñ 27-nde Yuqarı Radada «Ses» fraktsiyasınıñ yolbaşçısı Serğiy Rahmanin «Donbas ve Qırımnı işğalden qurtaruv planını» taqdim etti – «Ses» deputatlarınıñ fikirince, bu «Ukraina şartlarınen barışıqqa ketirecek» Minsk añlaşmalarınıñ alternativasıdır.
Ukraina Tış işler nazirligi Qırımnı işğalden qurtaruv strategiyasını azırlay. Şimdilik anca leyha şeklinde, qarama variantı bar, amma Milliy telükesizlik ve mudafaa şurası, ükümet ve Prezident ofisiniñ teşebbüsleri sayesinde kenişletilecektir.
Kyivdeki soñki matbuat konferentsiyasında Ukraina prezidenti Volodımır Zelenskıy Ukraina işğal etilgen topraqlarını, hususan Qırımnı kontroline qaytaruvdan vazgeçmey, dep işandırdı.
Baş nazir muavini – Ukrainanıñ vaqtınca işğal etilgen topraqlarınıñ reintegratsiya naziri Oleksiy Reznikov Qırım.Aqiqat Radiosınıñ yayınında Ukraina akimiyeti Qırımnıñ işğalden qurtarıluvınen bağlı muzakereler içün halqara meydançıqnı qurmağa istey, dep qayd etti. Amma onıñ ne vaqıt ve nasıl bir formatta olacağını tahmin etip olamay.
