Ukraina TİN Qırımdaki Rusiye mahkemesi tarafından qırımtatar advokatı Edem Semedlâyevniñ tevqif etilmesine "zenaat aqlarınıñ bozuluvı" ve "tazyıq" dedi. Bunı Twitterde Ukraina TİN yolbaşçısınıñ birinci muavini Emine Ceppar yazdı.
"Ukraina vatandaşlarına qarşı bir çoq siyasiy uydurma mahkeme davalarında imayeci olğan qırımtatar advokatı Edem Semedlâyev muvaqqat işğal etilgen Qırımdaki Rusiye mahkemesiniñ qararınen uydurma memuriy davalarğa köre 12 künge ve para cezasına mahküm etildi. Advokatnıñ oktâbrniñ 25-nde qanunsız yaqalanılğan qırımtatarlarğa yardım köstergen zaman ilk tutulmasından soñ tevqif etilmesi - zenaat aqqlarınıñ ve advokatlıq faaliyeti kefaletleriniñ bozuvı ve tazyıqtır", - dep yazdı Ceppar.
Noyabrniñ 11-nde Rusiye kontrolindeki Aqmescitniñ Kiyev rayon mahkemesi advokat Edem Semedlâyevni 12 künge apiske aldı ve Ekstremizm ile küreş merkeziniñ hadimlerinden biriniñ ögünde soyunmaqtan red etkeni içün 4 biñ ruble para cezasını berdi.
Cumaertesi künü, oktâbrniñ 25-nde, Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
Aqmescitte Rusiye kontrolindeki Qırım garnizor arbiy mahkemesiniñ binası ögünde tutulğan qırımtatar faalleri, jurnalistler ve advokat yarımada regionlarınıñ farqlı vaqtınca tutuv izolâtorlarına ketirildi. Oktâbrniñ 26-nda mahkeme keçirilmesi planlaştırıla.
Qırımnıñ Rusiye quvet müessiseleri bu tutuvlarnı tefsir etmey.
«Krım SOS» cemaat teşkilâtı Aqmescitte qırımtatar faalleri tutulğanı sebebinden «Qırım platformasınıñ» işini faalleştirmege çağırdı.
Rusiye quvetçileriniñ oktâbrniñ 25-nde qırımtatar faallerine qarşı yapqan areketlerini takbih etken beyanat Ukraina prezidentiniñ Qırım Muhtar Cumhuriyetindeki Temsilciligi tarafından aydınlatıldı.
