Ukraina TİN birinci muavini Emine Ceppar «Tınjden» ukrain neşrine intervyü vaqtında «Qırım platforması»nıñ beş esas faaliyet yönelişini ayttı.
«Platformanıñ faaliyeti al-azırda beş esas yöneleşten ibaret. İlk nevbette bu Qırımnıñ Rusiye tarafından işğal etilmesi tanımama siyasetiniñ birleştirilüvi, sanktsiyalar tesirini quvetleştirilüvi, Azaq-Qara deñizler bölgesinde ve Şarqiy Aq deñizde telükesizlikniñ temin etilüvi. Platformanıñ eñ müim aspekti insan aqlarınıñ qoruvı. Ve platforma Qırımnıñ muvaqqat işğaliniñ iqtisadiyatqa ve yarımadadaki ekologik vaziyetke menfiy tesiriniñ aradan qaldırılması içündir», – dep qayd etti o.
Ukraina tış işler nazir muavini Emine Ceppar qayd etkeni kibi, «Qırım platforması»nıñ maqsadı – Qırımnı işğalden azat etüv meselesinde halqara toplulığınıñ diqqatını ve resurslarnı birleştirmektir.
«Qırım platforması yarımadanıñ işğalden azat etilmesi içün umumiy strategiyanıñ tış siyaset elementi olmalıdır. Esas maqsadı Ukrainıñ yarımada üzerinde suverenitetini ğayrıdan tiklemektir. Oña irişmek içün halqara toplulığınıñ ıntıluvını quvetleştirmek pek müim», – dedi Ceppar.
Ukraina prezidenti Volodımır Zelenskıy, fevralnıñ 26-nda, cuma künü, Qırımnıñ işğalden azat etilüvi ve reintegratsiyası içün yapılğan tedbirler aqqında ferman imzaladı.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
