Ukraina TİN başı Dmıtro Kuleba işğal etilgen Qırım meselesi sırf Ukrainanıñ degil, global meseledir, dep bildirdi. Bunı Kuleba «Ukrinform» neşriniñ saytındaki blogunda yazdı.
«Qırımnıñ işğali sırf Ukraina meselesi degil, global meseledir. BMT ve dünya içün halqara barışıq ve telükesizlik, sıñırlarnıñ bozulmaması, navigatsiya serbestligi, insan ve tamır halqları aqlarınıñ qorunması ve ekologiya telükesizligi kibi esas printsipleri içün havflıdır. Ukraina prezidenti aytqanı kibi, bugünde Qırımda flora ve fauna yerine flot ve soldatlardır», – Zelenskıynıñ BMT BA çıqışını tefsir etip dedi Kuleba.
Ukraina prezidenti Volodımır Zelenskıy New Yorktaki BM Baş Assambleyasınıñ 76-ncı sessiyasında çıqışta bulunıp, işğal etilgen Qırımdaki vaziyet aqqında tarif etti.
Zelenskıy BM Baş kâtibi Antonio Guterres ile körüшип, Qırımda, Donbasta ve Rusiyede tevqif etilgen 450 ukrainniñ azat etilmesinde yardım etmesini istep cedvel berdi.
BM Baş Assambleyası Donbas ve Qırım meseleleri çezilecek meydançıqlardan biri ola, dep tüşüne Ukraina prezidenti Volodımır Zelenskıy.
Ukraina Tış işler naziri Dmıtro Kuleba Volodımır Zelenskıynıñ BM Baş Assambleyasınıñ sessiyasında iştirak etmek içün ABDge kerçekleştirecek ziyareti vaqtında «bütün muzakerelerde Qırım qırmızı yip» olacaq, dep bildirgen edi.
BM Baş Assambleyası yetmiş altıncı sessiyasını sentâbrniñ 14-nde açtı. BM Baş Assambleyasınıñ umumiy munaqaşaları sentâbrniñ 21-nden sentâbrniñ 27-ne qadar keçirilecek.
