BM Baş Assambleyası Donbas ve Qırım meseleleri çezilecek meydançıqlardan biri ola, dep tüşüne Ukraina prezidenti Volodımır Zelenskıy. Bu aqta o, Baş Assambleyanıñ 76-ncı sessiyasında iştirak etmek içün kelgen New Yorkta jurnalistlerge ayttı.
«Tek aytıp keçmege degil, belli areketler yapılmasını talap etmek kerekmiz. Biz bütün meydançıqlarda Donbas ve Qırım meselesini çezmege tırışamız. BM – esas meydançıqlardan biridir. Ve bu imkânnı qaçırmamalımız», – dep bildire Zelenskıynıñ aytqanlarını «Dom» telekanalı.
O, ABD ziyareti vaqtında bir çoq memleketniñ liderlerinen körüşip, semereli bir netice olacağına ümüt ete. Onıñ malümatına köre, Türkiye prezidentinen körüşüv keçirilmesi planlaştırıla.
«Birleşken Milletlerniñ «Qırım platformasını» tanıması bizim içün pek müim. Bu zor zamanlarda ortaqlarımız Ukrainağa qoltutar, dep ayta bilemiz, mence», – dedi Zelenskıy.
Ukraina Tış işler naziri Dmıtro Kuleba Volodımır Zelenskıynıñ BM Baş Assambleyasınıñ sessiyasında iştirak etmek içün ABDge kerçekleştirecek ziyareti vaqtında «bütün muzakerelerde Qırım qırmızı yip» olacaq, dep bildirgen edi.
BM Baş Assambleyası yetmiş altıncı sessiyasını sentâbrniñ 14-nde açtı. BM Baş Assambleyasınıñ umumiy munaqaşaları sentâbrniñ 21-nden sentâbrniñ 27-ne qadar keçirilecek.
Sentâbrniñ 9-nda BM Baş Assambleyası «Ukrainanıñ vaqtınca işğal etilgen topraqlarındaki vaziyet» maddesini saqlav qararına ve onı Baş Assambleyanıñ 76-ncı sessiyası kün tertibiniñ leyhasına kirsetüvge qoltuttı.
Sentâbrniñ 2-nde Birleşken Milletler, Baş kâtibi António Guterresniñ Qırım ve Aqyarda insan aqlarınıñ bozuluvına dair yañı maruzasını aydınlattı. Vesiqada qayd etilgenine köre, BM Baş kâtibiniñ maruzası 2020 senesi iyülniñ 1-nden 2021 senesi iyünniñ 30-na qadar müddetni qavrap ala ve «insan aqları ve halqara gumanitar uquq bozuluvlarını tarif ete».
