Link açıqlığı

Saatnıñ esas haberi

Zelenskıy BMT Baş kâtibinden ukrainlerniñ Rusiye apsinden azat etilmesine yardım etmesini istedi – Prezident ofisi


Volodımır Zelenskıy (sol taraftan) Antоnio Guterres (sağ taraftan)
Volodımır Zelenskıy (sol taraftan) Antоnio Guterres (sağ taraftan)

Ukraina prezidenti Volodımır Zelenskıy BMT Baş kâtibi Antonio Guterres ile körüşüv vaqtında, Qırımda, Donbasta ve Rusiyede tevqif etilgen 450 ukrainniñ azat etilmesinde yardım etmesini istep cedvel berdi.

Bundan ğayrı, Zelenskıy bu körüşüv vaqtında «Qırım platforması» qararlarınıñ ömürge keçirilmesi «BMT-nıñ mesüliyeti» olğanını ayttı.

«Qırım platforması»nıñ soñ maqsadı - Qırımnıñ qaytarılması - BMT Nizamnamesine ürmetni ğayrıdan tikleycek. «Qırım platforması» qararlarınıñ ömürge keçirilmesi BMT-nıñ mesüliyetidir, dep sayam», – Prezident ofisi Zelenskıynıñ aytqanlarından alıntı ketire.

BMT Baş Assambleyası Donbas ve Qırım meseleleri çezilecek meydançıqlardan biri ola, dep tüşüne Ukraina prezidenti Volodımır Zelenskıy.

Ukraina Tış işler naziri Dmıtro Kuleba Volodımır Zelenskıynıñ BM Baş Assambleyasınıñ sessiyasında iştirak etmek içün ABDge kerçekleştirecek ziyareti vaqtında «bütün muzakerelerde Qırım qırmızı yip» olacaq, dep bildirgen edi.

BM Baş Assambleyası yetmiş altıncı sessiyasını sentâbrniñ 14-nde açtı. BM Baş Assambleyasınıñ umumiy munaqaşaları sentâbrniñ 21-nden sentâbrniñ 27-ne qadar keçirilecek.

Sentâbrniñ 9-nda BM Baş Assambleyası «Ukrainanıñ vaqtınca işğal etilgen topraqlarındaki vaziyet» maddesini saqlav qararına ve onı Baş Assambleyanıñ 76-ncı sessiyası kün tertibiniñ leyhasına kirsetüvge qoltuttı.

Sentâbrniñ 2-nde Birleşken Milletler, Baş kâtibi António Guterresniñ Qırım ve Aqyarda insan aqlarınıñ bozuluvına dair yañı maruzasını aydınlattı. Vesiqada qayd etilgenine köre, BM Baş kâtibiniñ maruzası 2020 senesi iyülniñ 1-nden 2021 senesi iyünniñ 30-na qadar müddetni qavrap ala ve «insan aqları ve halqara gumanitar uquq bozuluvlarını tarif ete».

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG