Ukraina Tış işler naziriniñ birinci muavini Emine Ceppar noyabrniñ 1-nde Aqmescitteki mahkeme binası ögünde Rusiye quvetçileriniñ qırımtatar faallerini kene tutqanını takbih etti.
«Qırımdaki repressiyalarnıñ antirekordları. Rusiye işğalcisi bugün (noyabrniñ 1-nde – QA) 19 qırımtatarnı tuttı, aralarında 7 qadın ve 1 jurnalist bar. Olar Aqmescitteki lafta «mahkeme» binası ögüne kelip, Qurmandaki «Hizb ut-Tahrir davası» boyunca mahkeme oturışuvınıñ neticelerini bekledi», – dep yazdı Ceppar Twitterde.
«Vaqtınca işğal etilgen Qırımda Rusiyeniñ qırımtatarlarnı taqip etüv ve zulum etüv siyasetini takbih etemiz. Qırımda insanlarnıñ kütleviy tutulmasını toqtatmaq ve qanunsız tutulğan bütün Ukraina vatandaşlarını azat ettirmek içün halqara toplulıqnı Rusiyege qarşı basqı yapmasını devam etmesine çağıramız», – dep qoştı o.
Aqmescitte noyabrniñ 1-nde Rusiye kontrolindeki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» toplaşuvına diñleyici olaraq kelgen insanlarnı tuttı. Umumen 19 kişi tutuldı. Daa soñra advokatlar olarnı rayon bölüginden yiberdiler, polis «fevqulâde vaziyetniñ peyda oluv telükesi bar olğanda areket qaidelerine riayet etmegenleri» içün 18 memuriy protokol tizdi, dep bildirdi.
Qırım Muhtar Cumhuriyeti ve Aqyar prokuraturası noyabrniñ 1-nde faallerniñ tutulmasınen bağlı cinaiy tahqiqat başlattı.
Oktâbrniñ 25-nde Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
Aqmescitte Rusiye kontrolindeki Qırım garnizor arbiy mahkemesiniñ binası ögünde tutulğan qırımtatar faalleri, jurnalistler ve advokat yarımada regionlarınıñ farqlı vaqtınca tutuv izolâtorlarına ketirildi. Qırımdaki mahkeme qırımtatar faallerine qarşı memuriy qararlar çıqardı. Para cezalarınıñ umumiy miqdarı 170 biñ ruble oldı.
Rusiye quvetçileriniñ oktâbrniñ 25-nde qırımtatar faallerine qarşı yapqan areketlerini takbih etken beyanat Ukraina prezidentiniñ Qırım Muhtar Cumhuriyetindeki Temsilciligi tarafından aydınlatıldı.
