Qırımdaki mahkeme oktâbrniñ 25-nde Aqmescitteki mahkeme binası ögünde Rusiye quvetçileri tarafından tutulğan qırımtatar faallerine qarşı memuriy qararlar çıqardı. Para cezalarınıñ umumiy miqdarı 170 biñ ruble oldı.
Bu aqta «Qırım birdemligi» cemaat birleşmesi Qırım.Aqiqatqa bildirdi.
Berilgen malümatqa köre, mahkeme 14 insanğa 10 biñden 15 biñ rublege qadar para cezasını berdi, 7 faalge aqlayıcı mahkeme qararları çıqarıldı. Mahkeme tutulğan advokat Edem Semedlâyevniñ polis hadimine boysunmama aqqında Rusiye Memuriy uquq bozuvları kodeksiniñ 19.3 maddesine istinaden tizilgen ekinci protokolnı yekünlenmesi içün tizgen şahısqa yollamağa qarar aldı. Advokat şimdi azatlıqta buluna.
Oktâbrniñ 25-nde Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
Aqmescitte Rusiye kontrolindeki Qırım garnizor arbiy mahkemesiniñ binası ögünde tutulğan qırımtatar faalleri, jurnalistler ve advokat yarımada regionlarınıñ farqlı vaqtınca tutuv izolâtorlarına ketirildi. Oktâbrniñ 26-nda mahkeme keçirilmesi planlaştırıla.
Qırımnıñ Rusiye quvet müessiseleri bu tutuvlarnı tefsir etmey.
«Krım SOS» cemaat teşkilâtı Aqmescitte qırımtatar faalleri tutulğanı sebebinden «Qırım platformasınıñ» işini faalleştirmege çağırdı.
Rusiye quvetçileriniñ oktâbrniñ 25-nde qırımtatar faallerine qarşı yapqan areketlerini takbih etken beyanat Ukraina prezidentiniñ Qırım Muhtar Cumhuriyetindeki Temsilciligi tarafından aydınlatıldı.
Oktâbrniñ 26-nda Aqmescitte tutulğan faallerniñ mahkemeleri oldı.
